«NI dakładna skazała ich abodvuch uklučyć». Što za novaja tajamnica biełaruskaj palityki?
U aficyjnym telehram-kanale Savieta Respubliki na vielmi karotki čas źjaviłasia karotkaje paviedamleńnie: «NI čietko skazała ich dvoich vklučiť — Zajca i Isačienko». Vidavočna, jano trapiła tudy pamyłkova zamiest pracoŭnaha čata, i, mahčyma, tyčycca kadravych pytańniaŭ.
Z paviedamleńnia možna daviedacca, jak u kamunikacyi pamiž saboj supracoŭniki Savieta Respubliki nazyvajuć Natallu Kačanavu — NI, što vidavočna skarot ad Natalli Ivanaŭny.
Kudy ž jana rašuča patrabuje ŭklučyć Zajca i Isačanku — na hetaje pytańnie adkazać składaniej. Leanid Zajac ciapier zajmaje pasadu vice-premjera pa sielskaj haspadarcy, a Anatol Isačanka — staršynia Mahiloŭskaha abłvykankama. Ale raniej abodva ŭ rozny čas pabyli namieśnikami Kačanavaj pa Saviecie Respubliki: Isačanka ŭ 2019-2021, a Zajac u 2021-2022-m.
Moža, Kačanavaj tak spadabałasia tahačasnaja supraca ź imi, što chočacca paŭtaryć jaje znoŭ, tamu ciapier jana dabivajecca, kab Łukašenka pryznačyŭ abodvuch čynoŭnikaŭ u Saviet Respubliki pa svajoj kvocie? Adnak hetamu supiarečyć ustalavanaja praktyka — zvyčajna ni vice-premjeraŭ, ni staršyniaŭ abłvykankamaŭ u hety orhan nie pryznačajuć, a sychod z vysokich pasadaŭ dziela siniekury ŭ Saviecie Respubliki dla abodvuch budzie značnym panižeńniem, znakam apały.
Tamu bolš vierahodna, što havorka idzie pra niejkuju čarhovuju mižviedamasnuju kamisiju, dziejnaść jakoj kuryruje Natalla Kačanava. Jana, jak viadoma, źjaŭlajecca adnoj z najbolš davieranych asob Łukašenki i jon časta daručaje joj arhanizoŭvać i kuryravać roznyja spravy, nie zaŭsiody datyčnyja dziejnaści ŭłasna Savieta Respubliki.
A moža ŭsio być i ŭvohule banalna: što ŭ suviazi z pačatkam pracy Savieta Respubliki novaha sklikańnia, usie členy jakoha, aprača kvoty Łukašenki, užo pryznačanyja, płanujecca niejkaje mierapryjemstva, i na im Natalla Kačanava choča bačyć znajomyja i pryjemnyja joj tvary. Tamu i rupicca, kab byłych namieśnikaŭ nie zabylisia zaprasić.
Ciapier čytajuć
Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie1
Kamientary