Kala 1000 rubloŭ padatkaŭ za kvateru, ź jakoj moŭčki źnikli kvataranty: žančyna atrymała niepryjemnaści praz zamiežnikaŭ
Minčanka zdała kvateru zamiežnikam — chłopcu i dziaŭčynie z Tadžykistana. Tyja abiacali, što abaviazkova vypišucca, kali źbiarucca źjazdžać. Ale ŭ vyniku zamiežniki moŭčki źnikli, a ŭładalnicy kvatery ciapier nieabchodna vypisvać ich praz sud. Da rašeńnia suda pryjdziecca płacić padatak za kvateru, u jakoj faktyčna nichto nie žyvie — šukać novych arandataraŭ nielha.
Svajoj sumnaj historyjaj žančyna pad nikam alenabutterfly padzialiłasia ŭ tyktoku.
— Miłyja biełarusy, nie zdavajcie kvatery na praciahły termin zamiežnikam, nie rehistrujcie ich bieź pieradapłaty minimum za try miesiacy. Bo jak by jany ni abiacali, što vypišucca, kali buduć źjazdžać, jany nie vypisvajucca.
Žančyna skardzicca: kab padać pazoŭ u sud, treba zapłacić dziaržpošlinu plus jašče advakat choča atrymać za svaju dapamohu ŭ składańni pazovu 500 rubloŭ.
— A jašče ja budu płacić padatak da taho momantu, pakul ich nie vypišuć. I spahnać hrošy mnie budzie niama z kaho, tamu što jany źjechali.
U mihracyjnaj słužbie žančynie paćvierdzili, što vypisać byłych kvatarantaŭ samastojna jana nie moža — tolki praz sud. Naviedvańnie padatkovaj taksama aptymizmu nie dadało. Tam skazali, što ŭ samym lepšym vypadku ŭsia sprava zojmie dva miesiacy i ŭvieś hety čas padatki za faktyčna pustuju kvateru płacić pryjdziecca.
Žančyna vyrašyła sekanomić na pasłuhach advakata i padała pazoŭ u sud samastojna. Ale chutka vyśvietliłasia, što jana zrabiła niekalki pamyłak. Pa-pieršaje, dziaržpošlina na adnaho čałavieka składaje nie 120 rubloŭ jak jana dumała, a 200 (5 bazavych vieličyń). Pa-druhoje, treba było dasłać byłym kvatarantam list ab skasavańni damovy arendy. Pakolki aktualnaha adrasu arandataraŭ žančyna nie viedaje, jana vyrašyła adpravić list na svoj ža adras.
— Sud prypyniŭ spravu, a značyć u lutym ja płaču padatak 94 rubli za dva pakoi. U vyniku maje vydatki na adpraŭleńnie lista skłali 32 rubli, za pazovy ja zapłaču 400 rubloŭ… Voś i ličycie sami, kolki treba brać pieradapłatu na vypadak, kali vašy kvataranty źjeduć, nie źniaŭšysia z rehistracyjnaha ŭliku. A što buduć rabić babuli, u jakich niama takich hrošaj na padaču pazovaŭ i apłatu padatkaŭ? Mnie, naprykład, treba budzie płacić padatki da listapada — heta kala 1000 rubloŭ, kali sud admovicca ich vypisać.
Niechta z kamientataraŭ vyrašyŭ padzialicca ŭłasnym dośviedam: «U mianie była takaja samaja situacyja. Prosta ŭziała novych kvatarantaŭ biez damovy, nichto praviarać vas nie budzie, skončyŭsia dahavor i zaklučyła novy».
Ale ž błohierka śćviardžaje, što ciapier tak nie atrymajecca:
— Uvieś čas prychodziać z MUS i praviarajuć, chto tam žyvie. Štomiesiac.
Kamientary
Zachacieła płacić łukašenku padatki, atrymaj ŭznaharodu !👺🐑🤑