Takoha Chołmsa vy jašče nie bačyli
Karacist i zabijaka sa zvyčkami Terminatara i ahienta 007.
Šerłak Chołms (Sherlock Holmes)
ZŠA — Vialikabrytanija — Aŭstralija, 2009, kalarovy, 128 chv.
Režysior: Haj Ryčy
Roli vykonvajuć: Robert Daŭni mł., Džad Łoŭ, Rejčeł MakAdams, Mark Stronh, Edzi Marsan, Džejms Foks, Hans Mecisan
Žanr: Komiks-hatyčny detektyŭ pavodle scenaru Majkła Roberta Džonsana, Entani Pekchama, Sajmana Kinberha pavodle piersanažaŭ Konana Dojla
Adznaka: 7,5 (z 10)
Šerłak Chołms i doktar Ŭatsan aryštoŭvajuć niebiaśpiečnaha łorda Błekvuda. Ale pa paviešańni satanist zusim nie pamior. Jon teraryzuje horad i płanuje zachapić uładu ŭ Brytanskaj impieryi. Siabry-detektyvy iduć pa śledzie…
Šerłak Chołms na ekranie byvaŭ roznym. Byŭ kłasičny łondanski detektyŭ z zadumlivym tvaram Vasila Livanava. I byŭ niedareka, za jakoha pracavaŭ Ŭatsan. Byŭ Šerłak Chołms chudy i toŭsty. I byŭ navat Šerłak Chołms — žančyna. Ale hieroja, jakoha prapanavaŭ nam Haj Ryčy, śviet navat nie ŭjaŭlaŭ.
Novy Chołms u vykanańni Roberta Daŭni — karacist i zabijaka sa zvyčkami Terminatara i ahienta 007. Jon krucić amury z avanturystkaju Iren Adler, spyniaje stužkavyja piły pierad samym nosam achviary i sihaje ŭ Temzu z akna. Nie sastupaje zubadrabilnamu Chołmsu i doktar Ŭatsan (Džud Łoŭ). Detektyŭna-hanhsterskaja paračka raznosić Łondan (i złačynny śviet) va ŭščent.
«Šerłak Chołms» Haja Ryčy — udarny komiks u šera-hatyčnych tanach. Jahonyja svajaki — mańjačny tryler bratoŭ Hjuz («Z apramietnaj»), ličbavy francuski «Vidok» i kazki pra Supiermena. Novyja pryhody nie majuć ničoha supolnaha z kananičnymi historyjami pra Šerłaka Chołmsa. A Konan Dojl, jaki byŭ śpirytam, rydaje ad kpinaŭ z zamahilnaje mistyki.
Zatoje jość Biejkier-stryt i źlakanaja pryhodami misis Chadsan.
Jość niaźmiennaja skrypka i lulka.
I jość słynny deduktyŭny mietad, pierad jakim biaśsilnyja samyja akultnyja zmovy.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy29
Kamientary