U ZŠA raspaŭsiudziłasia novaje paskudstva — «hierain z zapraŭki»
Havorka idzie pra rečyva, viadomaje jak tyjaniepcin. Jaho časta nazyvajuć «hierainam z zapraŭki», bo ŭ ZŠA jano svabodna pradajecca ŭ praduktovych kramach i na zapraŭkach, a taksama i praź internet jak charčovy dadatak.
Tyjaniepcin maje ŭłaścivaści apioidaŭ i naležyć da kłasa rečyvaŭ, spažyvańnie jakich składana ŭrehulavać zakanadaŭča, piša The New York Times.
Niadaŭna atrymała rozhałas historyja maładoha baćki Eryka, jaki razam sa svajoj žonkaj En nakiroŭvaŭsia na sustreču z vychavacielami svaich dziaciej. Adnak kali jon išoŭ pa parkoŭcy da mašyny, jamu raptam stała kiepska: jaho pačało kałacić, jon uvieś uspacieŭ. Jahonaja žonka En ustryvožyłasia i nieadkładna patelefanavała ŭ słužbu 911, bo Eryk niezadoŭha da taho prachodziŭ kurs reabilitacyi ad narkatyčnaj zaležnaści ŭ klinicy.
— Ty niešta pryniaŭ? — spytała En u muža.
— Adnu dozu, adnu dozu… — pramarmytaŭ Eryk i nieprytomny pavaliŭsia na ziamlu.
U balnicy chutkaj dapamohi daktary sprabavali viarnuć Eryka ŭ prytomnaść z dapamohaj defibrylatara. En pakazała im fłakončyk z nadpisam Neptune's Fix, jaki jana znajšła ŭ mašynie.
Asnoŭny inhredyjent u Neptune's Fix — tyjaniepcin.
Pradukty z tyjaniepcinam masava pradajucca ŭ jakaści charčovych dadatkaŭ, jakija palapšajuć nastroj i ŭvažlivaść. Adnak tyjaniepcin pry hetym vyklikaje pryzvyčajvańnie i patencyjna moža mieć škodnaje ŭździejańnie na arhanizm. Tamu ŭ Amierycy jaho i nazyvajuć «hierainam z zapraŭki»: jon svabodna pradajecca ŭ praduktovych kramach, navat na aŭtazapravačnych stancyjach, a taksama i praź internet jak charčovy dadatak.
Inšyja padobnyja preparaty, prykładam, fienibut, taksama vyklikajuć pryzvyčajvańnie i patencyjna mohuć nanosić vializnuju škodu zdaroŭju. U Biełarusi fienibut pradajecca biez recepta, a voś u Litvie, Francyi i ZŠA jon zabaronieny, ličycca narkatyčnym rečyvam.
Kab vyrašyć novuju prablemu, štaty Fłaryda, Mičyhan i Ahajo zabaranili abo istotna abmiežavali prodaž tyjaniepcinu.
Tyjaniepcin byŭ pieršapačatkova raspracavany francuzskimi daśledčykami ŭ 1960-ch hadach jak antydepresant. Ën byŭ dazvoleny dla vykarystańnia ŭ mnohich krainach śvietu. Adnak kali jaho prymać u bolšych dozach, jon akazvaje efiekt, padobny da efiektaŭ apioidaŭ, vyklikajučy karotkačasovuju ejfaryju.
U Biełarusi tyjaniepcin dazvoleny dla vykarystańnia, ale tolki ŭ vyhladzie lekavaha srodku.
Ciapier čytajuć
Siarhiej Cichanoŭski pierabraŭsia žyć u Łos-Andželes18
Kamientary