Cichanoŭskaja pra Prakopjeva: U čałavieka šmat enierhii, šmat što choča realizavać, ale niejak usio kidaje
Lidarka demakratyčnych siłaŭ Biełarusi Śviatłana Cichanoŭskaja ŭ novym TOKu padzialiłasia svaim staŭleńniem da Vadzima Prakopjeva, a taksama jaho płanu abjadnańnia biełaruskaj dyjaspary i pieraŭtvareńnia jaje ŭ palityčnuju siłu.
Padčas intervju Śviatłana Cichanoŭskaja adkazvała na pytańni, što dasłali joj čytačy «Našaj Nivy». Adno ź ich było nastupnym: «Čamu Prakopjeva niama ŭ Kabiniecie? Čamu vializnaja enierhija hetaha čałavieka nijak nie vykarystoŭvajecca? Čamu Kabiniet jaho paźbiahaje?»
Śviatłana Cichanoŭskaja pahadziłasia z tym, što Vadzim Prakopjeŭ, znajomstva ź jakim u jaje adbyłosia ŭ 2020-m hodzie, — vielmi enierhičny čałaviek, jaki poŭnicca idejami i ŭsialaje ŭ navakolnych upeŭnienaść. Razam z tym, pa słovach Śviatłany, u jaje skłałasia ŭražańnie, što zadumanaje Prakopjeŭ časta nie davodzić da kanca:
«Ja nie chaču nikoha pakryŭdzić. U čałavieka šmat enierhii. Šmat što choča realizavać. Ale niejak usio kidaje». Kali ž havaryć ab tym, čamu Prakopjeva niama ŭ Kabiniecie, to Śviatłana zaŭvažyła, što palityk — «sam sabie haspadar», i tamu «naŭrad ci budzie pracavać u struktury, prytrymlivacca niejkich peŭnych pravił. Jon — čałaviek-śviata».
Pra «płan Prakopjeva»
U dalejšaj razmovie lidarka demakratyčnych siłaŭ Biełarusi dała svaju acenku płanu Vadzima Prakopjeva ab abjadnańni biełaruskaj dyjaspary i stvareńnia ź jaje realnaj palityčnaj siły.
«Tut jość sprečny momant. Kali my kažam «treba abjadnoŭvać», to heta vyhladaje tak, što ludzi nie abjadnanyja. Abjadnańnie adbyvajecca, kali ŭ nas jość supolnyja dziejańni. Zaŭždy, kali kažaš, što treba niešta zrabić, prychodziać, abjadnoŭvajucca i robiać», — zaŭvažaje Cichanoŭskaje i dadaje, što razumieje pasył Prakopjeva ab stvareńni ahulnaj struktury.
«Mahčyma, heta dobraja inicyjatyva. Ale ja nie ŭpeŭnienaja, što tak budzie pracavać, bo kožnaja dyjaspara — asobnaja adzinka. Navat unutry adnoj dyjaspary jość padzieły. Roznyja arhanizacyja sprabujuć pracavać razam. I nie zaŭždy ŭ ich heta atrymlivajecca. I heta narmalna. Nam nie treba siadzieć u adnym pakoi, kab usie bačyli, što my abjadnanyja. Hałoŭnaje, što robicca ahulnaja sprava».
U cełym, pa słovach Cichanoŭskaj, ideja, ahučanaja Prakopjevym, dobraja, i jana žadaje jaje paśpiachovaj realizacyi. Ale dla hetaha patrebny dziejańni.
Pra «čatyry akny mahčymaściaŭ» Prakopjeva
Vadzim Prakopjeŭ ahučvaŭ čatyry akna mahčymaściaŭ. Heta vybary 2025 hoda, pieramovy pamiž Rasijaj i Ukrainaj, raptoŭnaja śmierć Łukašenki, źmiena ŭłady ŭ Kramli. Ci bačyć hetyja vokny Śviatłana Cichanoŭskaja i ci zhodnaja z tym, što ich možna ŭsprymać jak mahčymaści? I jakoje ź ich najbolš realistyčnaje?
Śviatłana Cichanoŭskaj zaŭvažyła, što akramia nazvanych Prakopjevym, niekalki inšych voknaŭ mahčymaściaŭ adznačanyja ŭ Stratehii demakratyčnych sił.
Ale zadača nie ŭ tym, kab ich bačyć, a ŭ tym, kab być da ich padrychtavanymi. U toj ža čas nielha padrychtavacca da ŭsich. Zrazumieła, što možna prapisać kankretnyja kroki pa kožnamu ź ich, ale, jak zaŭvažaje Cichanoŭskaja, niama ŭpeŭnienaści, što ŭsio pojdzie pa płanie.
Ciažka skazać, jakoje z nazvanych voknaŭ mahčymaściaŭ najbolš realistyčnaje.
«My pavinny ŭkładvacca ŭ toje, kab asłabić režym. Kab u vypadku, kali adno z hetych voknaŭ adčyniłasia, režym byŭ maksimalna słaby», — adznačaje Cichanoŭskaja.
Na pohlad lidarki demakratyčnych siłaŭ Biełarusi, pieramieny ŭ Biełarusi adbuducca našmat raniej za pieramieny ŭ Rasii. Heta jana tłumačyć tym, što biełaruskaje hramadstva bolš kansalidavanaje.
«My nie možam praduhledzieć, jak što budzie adbyvacca. Ale treba trymacca razam, supracoŭničać, być u pastajannym kantakcie ź biełarusami ŭnutry krainy.
Ja ni ŭ jakim razie nie chaču, kab nas padzialali na tych, chto zastaŭsia, i tych, chto zjechaŭ. Zrazumieła, tyja, chto zjechaŭ, mohuć i pavinny rabić bolš. My pavinny rabić pracu i za siabie, i za tych, chto ŭ krainie. Ale my pavinny pamiatać, što šmat robicca i ŭnutry krainy. Kamunikacyja pavinna być. My pavinny rychtavacca da luboha akna mahčymaściaŭ».
Hladzicie całkam:
Ciapier čytajuć
Kolki sioleta tracili na viasielli ŭ Biełarusi? Sabrali realnyja ličby tych, chto pabyvaŭ u ZAHSie7
Kamientary