Padčas čarhovaj ataki Rasii na ŭkrainskuju partovuju infrastrukturu na Dunai, ździejśnienaj 13-14 śniežnia, źbity rasijski bieśpiłotnik upaŭ na terytoryju Rumynii. Pra heta paviedamili ŭ Ministerstvie abarony hetaj krainy.
«Ź sierady da čaćviarha, 13-14 śniežnia, rasijskija vojski praciahvali abstreły ź bieśpiłotnikaŭ ukrainskaj partovaj infrastruktury ŭ rajonie miažy pamiž Ukrainaj i Rumynijaj. Radarnaja sistema nazirańnia rumynskaj armii zafiksavała mahčymaje niesankcyjanavanaje praniknieńnie ŭ nacyjanalnuju pavietranuju prastoru, pryčym sihnał byŭ vyjaŭleny na nizkaj vyšyni na šlachu da rajona vioski Hryndu ŭ paviecie Tułča», — havorycca ŭ paviedamleńni.
U viedamstvie adznačyli, što nočču 14 śniežnia pradstaŭniki Ministerstva abarony Rumynii adpravilisia da miesca incydentu i ranicaj paviedamili, što dron pakinuŭ varonku hłybinioj 1,5 mietra kala vioski Hryndu, raźmieščanaj prykładna za 8 kiłamietraŭ ad ukrainskaha porta Rani.
«Ministerstva nacyjanalnaj abarony Rumynii rašuča asudžaje ataki, učynienyja Rasijskaj Fiederacyjaj na asobnyja abjekty i elemienty hramadzianskaj infrastruktury va ŭkrainskich partach na Dunai. Hetyja napady źjaŭlajucca nieapraŭdanymi i supiarečać normam mižnarodnaha humanitarnaha prava», — adznačyli ŭ viedamstvie.
Heta ŭžo nie pieršy vypadak, kali abłomki rasijskich dronaŭ, zapuščanych pa Ukrainie, padajuć na terytoryju Rumynii. Tak, u noč na 4 vieraśnia Rasija atakavała partovuju infrastrukturu ŭ Izmailskim rajonie Adeskaj vobłaści. Ukraina zajaviła, što rasijskija drony ŭpali na terytoryi Rumynii. Rumyny admaŭlali heta niekalki dzion, ale 6 vieraśnia ministr abarony krainy pryznaŭ, što na jaje terytoryi znajšli abłomki rasijskaha drona.
Ciapier čytajuć
Jeździli šukać navat u BSSR, a nieapaznanaje cieła 30 hadoŭ lažała ŭ śpiecschoviščy. Novyja detali zahadkavaha źniknieńnia ŭ ZŠA biełaruskaha piśmieńnika Mikoły Celeša22
Kamientary