Knihu pra pinskija bałoty naminavali na premiju histaryčnaj knihi hoda ŭ Polščy
Histaryčnuju premiju imia Kazimieža Mačarskaha štohod uručaje horad Varšava. Dziesiać hałoŭnych kankurentaŭ žury sioleta vybrała sa 104 knih, dasłanych na konkurs, piša «Radyjo Svaboda».
Siarod naminantaŭ — kniha «Pinskija bałoty. Pryroda, viedy i palityka na polskim Paleśsi da 1945 hoda». (Pińskie błota. Natura, wiedza i polityka na polskim Polesiu do 1945 roku). Jaje aŭtar — historyk, prafiesar Instytuta historyi Polskaj akademii navuk Słavamir Łotyš.
Heta pieršaja manahrafija pa historyi mižvajennaj Polščy (u jaje skład uvachodziła i biełaruskaje Zachodniaje Paleśsie), śviadoma napisanaja z ekałahičnaj pierśpiektyvy.
«Pra Paleśsie pisali tak, byccam jano ničym nie adroźnivałasia ad inšych krajoŭ. Adnak tam usio vyhladała pa-inšamu — siena źbirali pa kalena ŭ bałocie, handlavali naŭprost z łodki na pinskim rynku, a centralnaja častka Paleśsia na niekalki miesiacaŭ u hodzie pieratvarałasia va ŭnutranaje mora. Słavamir Łotyš pasprabavaŭ pierapisać mižvajennuju historyju hetaj ziamli, uziaŭšy za punkt adliku paŭsiudnyja bałoty. U toj čas, jak jon śćviardžaje, płany ich asušeńnia byli hałoŭnym elemientam palityki dziaržavy ŭ adnosinach da ŭschodnich ziamiel, bo tolki asušeńnie Paleśsia adkryvała šlach da jaho kałanizacyi», — havorycca ŭ anatacyi da knihi.
Knihu chvalać za toje, što, niahledziačy na jaje navukovaść, jana napisanaja žyvoj i bahataj eseistyčnaj movaj, jakaja pryciahvaje čytača ź pieršaj staronki i stvaraje zachaplalnaje čytańnie da apošniaj.
Premija imia Mačarskaha — heta adna z najvažniejšych histaryčnych premij krainy. Jana ŭšanoŭvaje pamiać Kazimieža Mačarskaha, žurnalista i jurysta, demakrata i žaŭniera Armii Krajovaj, jaki paśla vajny 11 hadoŭ znachodziŭsia ŭ źniavoleńni kamunistami. Jon byŭ aŭtaram «Razmoŭ z katam», zapisaŭ razmoŭ ź Jurhienam Stropam, likvidataram Varšaŭskaha hieta, ź jakim jon dzialiŭ adnu turemnuju kamieru ŭ varšaŭskim rajonie Makotaŭ.
Pieramožca stanie viadomy 26 listapada. Jon atrymaje kala 12 tysiač dalaraŭ hrašovaj uznaharody i statuetku.
Ciapier čytajuć
Pad ciskam muža Śviatłana Cichanoŭskaja admianiła intervju CNN i praciahnuła razmovu ź biełarusami ŭ Ńju-Jorku22
Kamientary