Arastovič źbirajecca ŭ prezidenty Ukrainy. Krym i Danbas jon prapanoŭvaje časova pakinuć Rasii

Dniami były daradca kiraŭnika Ofisa prezidenta Ukrainy apublikavaŭ u svaim telehram-kanale prahramu z čatyrnaccaci punktaŭ, ź jakimi źbirajecca iści na prezidenckija vybary. Całkam aznajomicca ź imi možna voś tut.

Pryviadziem prapanovy, jakija tyčacca viadzieńnia vajny.

«Prapanova kalektyŭnamu Zachadu — my hatovyja da varyjanta Kisindžera (viartańnie da stanu da pačatku vajny ŭ lutym 2022 hoda. — NN). Patrabujem ustupleńnia ŭ NATA z abaviazacielstvam nie advajoŭvać akupavanyja na momant ustupleńnia terytoryi, a damahacca ich viartańnia tolki palityčnym šlacham», — skazana ŭ prahramie.

«Na froncie stanovimsia ŭ stratehičnuju abaronu. Mianiajem kadravuju palityku ŭ siłach abarony na čałaviekacentryčnuju: bolš žyćciaŭ źbierahčy, bolš śpiecyjalistaŭ vyraścić. Mianiajem sistemu mabilizacyi: uvodzim padrychtoŭku reziervaŭ na apiaredžańnie i ratacyju mabilizavanych. Vypuskajem mužčyn za miažu — z umovaj viartańnia ŭ vypadku pryzyvu», — prapanuje Arastovič.

Siarod punktaŭ taksama — abjava nadzvyčajnaha stanovišča ŭ ekanomicy, enierhietycy i finansach dla skaračeńnia biurakratyčnych pracedur i chutčejšaha raźvićcia va ŭmovach vajny, masavy i lehalny dostup pryvatnaha biznesu da abaronnych zakazaŭ i padtrymki armii.

Arastovič patłumačyŭ punkt adnosna realnaj acenki viartańnia da raniejšych miežaŭ.

«Heta nie NATA ŭ abmien na terytoryi. Hetaje časovaje rašeńnie da taho momantu, pakul abstaviny i ŭmovy nie dazvolać nam viarnuć našy terytoryi palityčnym šlacham. Z-za siońniašniaha stanu rečaŭ na froncie i z-za pazicyi mnohich našych partnioraŭ razmovy ab vychadzie na miežy 1991 hoda zastanucca tolki razmovami».

U intervju rasijskamu vydańniu «Mieduza» Arastovič zajaviŭ, što tolki Pucin i niekalki čałaviek u jaho atačeńni pa-sapraŭdnamu chočuć vajavać z Ukrainaj, tamu paśla ich sychodu albo źviaržeńnia źjavicca bolš šancaŭ na viartańnie akupavanych terytoryj biez vajny.

A ŭkrainskaje hramadstva, jakoje zbolšaha vystupaje za vajnu da poŭnaha viartańnia terytoryj, sutykniecca z realnaściu, kali pieramoh na froncie niama, a kaniec vajny z Rasijaj nie harantavany navat paśla viartańnia ŭsich terytoryj, upeŭnieny palityk.

Arastovič vykazaŭsia i nakont budavańnia adnosin z Rasijaj:

«Rasija — naš susied, jana nikudy nie padzieniecca. Puciny prychodziać i adychodziać, a Rasija zastajecca. My ŭsie zacikaŭleny ŭ dźviuch rečach. Pa-pieršaje, kab Rasija stała mocnaj, svabodnaj, demakratyčnaj dziaržavaj. Pa-druhoje, kab Rasija była častkaj Zachadu. I kab jana nie syšła pad Kitaj, nie stała jadziernym satelitam Kitaja. Całkam moža akazacca tak, što z budučaj Rasijaj my možam akazacca kali nie niejtralnymi, to chaŭruśnikami — u ramkach, naprykład, adzinaj pazicyi Zachadu».

Arastovič budzie stvarać svaju ŭłasnuju palityčnuju partyju.

«Ja adnaznačna budu bałatavacca i stvarać «Partyju Arastoviča». U nas va Ukrainie tolki imiannyja partyi pracujuć. Jość brend, my jaho i budziem raźvivać. <…> Tyja, chto ładziać sacyjałahičnyja apytańni, kažuć, što ja dakładna razhladajusia ŭ jakaści kandydata ŭ prezidenty», — skazaŭ palityk.

Adnak jon dapuskaje imaviernaść taho, što prezidenckuju kampaniju daviadziecca vieści za miažoj z-za prablem ź biaśpiekaj.

Źviazana heta, pa słovach Arastoviča, z tym, što jon kanfliktuje z Ofisam prezidenta Ukrainy, za što «padviarhajecca cisku i pahrozam pramoha pieraśledu».

«Apošnim prykładam było toje, što sakratar Rady nacyjanalnaj biaśpieki i abarony Alaksiej Daniłaŭ, jaki źjaŭlajecca niepasrednym padnačalenym Zialenskaha, zajaviŭ, što ja rasijski špijon, dziejničaju ŭ rasijskich intaresach, i mnoj cikaviacca pravaachoŭnyja orhany», — raspavioŭ «Mieduzie» Alaksiej Arastovič.

Arastovič paćvierdziŭ, što ciapier nie va Ukrainie.

Palityk taksama vystupaje za admienu abmiežavańniaŭ u adnosinach da ruskaj movy razam z zachavańniem dziaržaŭnaha pryjarytetu ŭkrainskaj. Na jaho dumku, pieraśled za movu abo nacyjanalnaść musić žorstka karacca.

Raniej Arastovič nazyvaŭ siońniašniuju palityku Ukrainy ŭ adnosinach da Biełarusi «drennaj», bo jana nie padzialaje režymu Łukašenki i hramadskaj supolnaści.

«Vy — ahresary, vy — niahodniki, a vy — zabojcy, a vy — hultai, nie chočacie nam dapamahčy i hetak dalej. Takaja palityka vielmi drenna pracuje ź biełarusami. Bo klajmić dziaržavu ahresaram… A jak ža biełaruski supraciŭ, partyzany, jakija padryvali rejki, jak tyja ŭsie ludzi, jakija ciapier siadziać u turmach, a biełaruskaja apazicyja?» — razvažaje Arastovič.

Alaksiej Arastovič zdabyŭ šyrokuju viadomaść svaimi vystupami ŭ jutubie na pačatku vajny, ale nieŭzabavie straciŭ papularnaść va Ukrainie, zajmieŭ reputacyju papulista. 

Na siońnia Arastovič maje adzin z najvyšejšych antyrejtynhaŭ siarod ukrainskich palitykaŭ i hramadskich dziejačaŭ — 71%, zhodna z apošnim apytańniem sacyjałahičnaj słužby Centra Razumkova. Dla paraŭnańnia: Uładzimiru Zialenskamu daviarajuć 75% ukraincaŭ.

Akramia taho, ukrainskija pravaachoŭniki pačali rasśledavać spravu ŭ dačynieńni da Alaksieja Arastoviča paśla jaho skandalnych vykazvańniaŭ pra žančyn. Ën zajaŭlaje, što jaho słovy «ich chočacca dušyć i trachać, spačatku trachać, a paśla dušyć» vyrvali z kantekstu.

• 18
• 0
• 11
• 17
• 6
• 5
• 33
• 0