Biahun raskrytykavaŭ Azaronka: Ašaleły papulizm, pamnožany na stereatypnuju prapahandu
Aficyjozny prapahandyst Ilja Biahun u svaim telehram-kanale padniaŭ hołas suprać Ryhora Azaronka, rupara fašysckaha kryła łukašenkaŭcaŭ.
«Voś siadzieli jany niadaŭna ź Piatroŭskim (Piatro Piatroŭski — inšy prapahandyst — NN), razvažali ź miakkich kresłaŭ, što ajcišniki im nie stvaryli telefona abo sacyjalnaj sietki. A im što, zamoviŭ chtości? Z čaho treba rabić pradukt na rynak, jaki nie zdolny fizična vyjści na ŭzrovień rentabielnaści, nie kažučy ŭžo ab pryciahnieńni aŭdytoryi? Voś jość UKantakcie. Jakuju kankurentnuju pieravahu mohuć stvaryć biełaruskija ajcišniki, kab pieravabić karystalnikaŭ z VK taho ž? Chiba što jakaja technałahičnaja kiler-fiča, ale siońnia heta ŭžo nie vyznačalny faktar. Voś technałahična ŭbohi vajbier jość, papularny ŭ Biełarusi. Bo pryvykli. A pakul bujnych stvaralnikaŭ kantentu nie zavabiš, ničoha nie atrymajecca», — zaznačaje žurnalist.
Biahun spasyłajecca na dośvied Niamieččyny i Francyi, dzie mała ŭłasnych telefonaŭ, a ŭsio zaviazana na industryi mikraelektroniki Kitaja i Tajvania.
«Ajcišniki ničoha nie dali Biełarusi? A što, pavinny? Pracujuć, płaciać padatki, sacyjalnyja adličeńni», — zaznačaje Ilja Biahun.
«I ŭžo nie tym, chto nie ŭdzielničaje ŭ dabaŭlenym VUP, razvažać biez hłybokaha analizu, tykajučy palcam u azadak, — zakidaje Azaronku Biahun. — Mierkavańnie pavinna być ekśpiertnym, a nie imchošnym biez abhruntavańnia, nie kažučy ŭžo pra adkrytuju chłuśniu i sproby abhadzić industryju abo cełyja bujnyja płasty hramadzian».
«Tak-tak, byccam by zabylisia, jak toj ža Ryhor 15% nasielnictva krainy za luboŭ da roka psichičnachvorymi ličyŭ niadaŭna, potym absalutna biez usialakaha soramu braŭ intervju ŭ zaŭziataha rokiera Hasparana», — kaža Biahun.
«Ašaleły papulizm, pamnožany na stereatypnuju prapahandu pad vyhladam ideałohii i patryjatyzmu. A potym ja pavinien jašče lubić kahości? Dzieści bačyŭ epičnuju frazu: «Ryhor jość ruparam prezidenta i kaža toje, što toj dumaje», — źviartajecca Ilja Biahun da najvyšejšaha aŭtaryteta ŭ sistemie. — Heta značyć, puł žurnalistaŭ, dzie jaho niama, tranśluje adno, jon inšaje, a ciapier heta dumki pieršaha? Jak mif zručna, ale da realnaści nie maje nijakaha dačynieńnia».
Ilja Biahun — heta ŭ minułym prahramist, jaki ŭ 2020-m staŭ aktyvistam štaba Valeryja Capkały, a paśla niejki čas byŭ palitemihrantam, staraŭsia zblizicca z asiarodkam Śviatłany Cichanoŭskaj. Ën rana, jašče ŭ pačatku 2021 hoda, viarnuŭsia ŭ Biełaruś i staŭ miłym haściom prapahandysckich ŚMI. Lidary apazicyi ličyli jaho zasłancam łukašenkaŭskich śpiecsłužbaŭ.
Raniej kiraŭnica hrodzienskaha abłasnoha adździaleńnia «Biełaj Rusi» Śviatłana Varanica niekalki razoŭ stroha krytykavała Volhu Bondaravu — błohierku prarasijskaha čarnasocienskaha tołku. Jana ž zajaviła: «Nie chaču, kab maja kraina stanaviłasia azaronkaŭščynaj».
Čytajcie taksama:
Kiraŭnica hrodzienskaj «Biełaj Rusi» patroliła Bondaravu
«Chtości za joj staić». Čamu čynoŭniki słuchajucca Bondaravu
«Nie chaču, kab maja kraina stanaviłasia azaronkaŭščynaj». Ideołah z «Biełaj Rusi» vystupiła ź niečakanym pryznańniem
Chto taki Illa Biahun, jaki na dziaržaŭnym TB vylivaje brud na fondy salidarnaści i štab Cichanoŭskaj?
Kamientary
Tym bolš, kali havorka pra prychilnika novaj chvali zachodnierusizmu, jakaja spałučaje pachvału RI-SSSR-RF, pry čym savietaŭ i savieččynu, asabliva kamunista Stalina Azaronak chvalić rehularna.
Dy i chutka hadavina masavych rasstrełaŭ pradstaŭnikoŭ intelihiencyi, a što pra Kurapaty dy ahulna saviecki aparat dumaje Azaronak, chiba viadoma. A rasstrelvali nie niejkija abstraktnyja fašysty, a kamunisty - saviety.