Pytańnie ab vyklučeńni z BDU Taćciany Šapućki ŭźnimałasia na sustrečy z pradstaŭnikami biełaruskich uład u Kijevie i Brusieli.
Pra heta paviedamiŭ ministr zamiežnych spraŭ Šviecyi Karł Bilt 8 śniežnia ŭ bielhijskaj stalicy na pres-kanfierencyi paśla zaviaršeńnia sustrečy ministraŭ zamiežnych spraŭ krain ES i krain — udzielnic prahramy «Uschodniaje partniorstva».
Bilt zajaviŭ, što budzie «absalutna nieprymalna», kali vyklučeńnie z VNU adbyłosia z-za ŭdziełu Šapućki ŭ Forumie hramadzianskaj supolnaści Uschodniaha partniorstva. Hetaje mierapryjemstva prajšło ŭ Brusieli 16—17 listapada.
Kiraŭnik biełaruskaha MZS Siarhiej Martynaŭ adznačyŭ, što «vyklučaje nie ŭrad, a VNU».
Jon padkreśliŭ, što pryčynaj adličeńnia stała «kolkaść propuskaŭ».
U adkaz Bilt adznačyŭ, što «z kiraŭnictvam VNU źviazalisia pradstaŭniki pravaachoŭnych orhanaŭ». «Jany, viadoma, mahli cikavicca jaje propuskami, ale zvyčajna heta nie ŭvachodzić u ich abaviazki», — zajaviŭ šviedski ministr.
Pres-sakratar zarehistravanaj u Čechii arhanizacyi «Małady front» Taćciana Šapućka ŭdzielničała ŭ forumie biez dazvołu dekanata jurydyčnaha fakulteta BDU, dzie jana vučyłasia. Pra mahčymaść adličeńnia stała viadoma jašče padčas mierapryjemstva. 3 śniežnia kiraŭnictva «Maładoha frontu» paviedamiła pra vyklučeńnie Šapućki z VNU.
Kamientary