«Skazać, što my niešta zabaraniali — nie». Čynoŭniki vykazalisia adnosna zabarony ŭ škołach piesień na zamiežnych movach
Dniami na padstavie svaich krynic u sistemie adukacyi vydańnie BG.Media paviedamiła, što ŭ bresckich škołach zabaraniajuć na ŭsich školnych mierapryjemstvach vykonvać i ŭklučać pieśni na zamiežnych movach. Vydańnie «Lusterka» daviedałasia niekatoryja padrabiaznaści.
Kab razabracca ŭ situacyi i ŭdakładnić, ci sapraŭdy jość takaja zabarona, žurnalistka «Lusterka» jak mama školnika patelefanavała va ŭpraŭleńnie adukacyi administracyi Maskoŭskaha rajona Bresta.
Tam udakładnili, što
rasparadžeńnie ab tym, kab «nie hučali pieśni na zamiežnaj movie», tyčycca tolki liniejek. Na mierapryjemstvach, dzie padymajuć ściah i hučyć himn, «pavinny być i našy biełaruskija pieśni», skazali ŭ viedamstvie, padkreśliŭšy, što heta elemient patryjatyčnaha vychavańnia.
«Heta nie naša rasparadžeńnie, heta skazała Hałoŭnaje ŭpraŭleńnie adukacyi [Bresckaha abłvykankama], — patłumačyła surazmoŭca z upraŭleńnia, spasłaŭšysia na toje, što inicyjatar usiaho — Ministerstva kultury. — Ja nie viedaju, z čym heta źviazana. My ŭ dziaržaŭnaj ustanovie adukacyi».
Pa słovach čynoŭnicy, takaja navina zakranuła liniejki pa ŭsioj krainie. Jana taksama raspaviała, što
atrymała ŭ Hałoŭnym upraŭleńni adukacyi Bresckaha abłvykankama «miełodyi», jakija «mohuć hučać» na liniejkach, i razasłała ich pa škołach. Heta kampazicyi na biełaruskaj i ruskaj movach.
Na pytańnie, a ci mohuć kampazicyi na zamiežnaj movie ŭklučać na školnych dyskatekach, jana adkazała: «Na dyskatecy moža być».
— A na ŭrokach? Padčas zaniatkaŭ anhlijskaj nastaŭnica razdrukoŭvała teksty piesień i dzieci padpiavali, kab lepš zasvoić fanietyku.
— Pra heta nie mahu vam skazać. Jość mietadyst, ale naohuł ministr niadaŭna kazaŭ pra toje, što kulturu zamiežnaj dziaržavy na ŭrokach anhlijskaj movy vyvučać nie pavinny. Tolki kulturu i tradycyi biełaruskaj dziaržavy na zamiežnaj movie.
Nasamreč pra heta niadaŭna kazaŭ nie sam ministr Andrej Ivaniec, a jahony namieśnik Alaksandr Kadłubaj.
U adździele adukacyi Bresckaha harvykankama, kudy adnosicca ŭpraŭleńnie adukacyi Maskoŭskaha rajona, pytańniu «Lusterka» ab tym, ci nie zabaroniać na ŭrokach anhlijskaj movy ŭklučać pieśni na zamiežnaj movie, ździvilisia.
«Vy ž nie budziecie anhlijskuju pa-rusku vyvučać, praŭda?» — zadali rytaryčnaje pytańnie ŭ adździele.
Pra zabaronu ŭklučać na mierapryjemstvach pieśni na zamiežnaj movie tam paviedamili, što ničoha, maŭlaŭ, nie viedajuć.
U adździele ŭstanoŭ adukacyi Ministerstva kultury, kudy «Lusterka» taksama patelefanavała ad imia baćkoŭ školnika, niekalki razoŭ padkreślili, što ni pra jakija zabarony havorka nie išła.
«U nas byŭ pratakoł, zhodna ź jakim Ministerstva kultury pavinna było ŭ peŭnyja terminy pierasłać rekamiendavany pieralik aŭdyjafajłaŭ patryjatyčnaj nakiravanaści, u tym liku himna Respubliki Biełaruś, dla vykarystańnia na ŭračystych mierapryjemstvach. Ministerstvam kultury hety pieralik byŭ składzieny i ŭ jakaści rekamiendacyj nakiravany ŭ Minadukacyi.
U adpaviednaści z pratakołam dalej, napeŭna, jon byŭ razasłany va ŭstanovy [adukacyi] albo ŭpraŭleńni dla vykarystańnia ŭ pracy, — patłumačyli ŭ viedamstvie i ŭdakładnili: — Heta była spasyłka na peŭnaha rodu patryjatyčnyja pieśni, biełaruskija ŭ asnoŭnym, dla vykarystańnia na mierapryjemstvach.
Skazać, što my niešta zabaraniali — nie. My prosta nakiroŭvajem śpisy rekamiendavanych [kampazicyj] dla vykarystańnia na ŭračystych mierapryjemstvach».
— Ci moža hučać zamiežnaja muzyka na dyskatekach?
— Zamiežnaja muzyka moža hučać i na [školnych] kancertach, kali jana, skažam tak, hodnaha źmiestu. Muzyka muzycy nie roŭnaja, i słovy ŭ pierakładzie taksama mohuć być roznymi.
Na dumku pradstaŭnicy Minkulta, patryjatyčnyja mierapryjemstvy, da jakich adnosicca i liniejka, — heta mierapryjemstvy ideałahičnaj nakiravanaści, tamu «chočacca, kab tam vykarystoŭvalisia» biełaruskija pieśni «pra Radzimu, patryjotyka».
«My prapanujem peŭnyja fajły, a dalej addajecca na mierkavańnie administracyi, dzie, kudy i jakija [vykarystoŭvać]. Zrazumieła, što dzieci śpiavajuć roznyja pieśni, ź imi pracujuć piedahohi roznych napramkaŭ, u našych ustanovach my vyvučajem vykanańnie na roznych movach. Heta praduhledžana prahramaj, — skazali ŭ ministerstvie. — Kali heta ŭsio ŭ pierakładzie nie maje niejkaha niehatyvu, značyć, usio narmalna».
Kab nie płacić padatak na sabak, minčuki pačali zdavać ich u punkty adłovu25
Kamientary