Daradca prezidenta Litvy: Zakryćcio dvuch punktaŭ na miažy ź Biełaruśsiu nie akaža istotnaha ŭpłyvu na ekanomiku
Aceńvajučy mahčymaść zakryćcia Litvoj punktaŭ propusku «Ćviaračus» i «Šumskas» na miažy ź Biełaruśsiu, daradca prezidenta Daryus Urbonas miarkuje, što takoje rašeńnie nie budzie ekanamična značnym. Akramia taho, heta dazvolić bolš efiektyŭna pieraraźmierkavać mahutnaści na astatnija čatyry pahranpunkty na miažy ź Biełaruśsiu, piša Delfi.lt.
«Tyja dva punkty, ja maju na ŭvazie «Ćviaračus» (ź biełaruskaha boku «Vidzy») i «Šumskas («Łoša»), jany, mahčyma, i nie hrajuć takoj istotnaj roli dla hetaha ruchu, bo praź ich nie moža prachodzić kamiercyjny transpart, abmiežavany peŭny abjom taho patoku, zakryćcio, mabyć, istotnaha ŭpłyvu, z ekanamičnaha punktu hledžańnia, nie akaža, — skazaŭ D. Urbonas.
«Mahčyma, [ich zakryćcio] dapamahło b ustanovam vyrašyć niekatoryja arhanizacyjnyja pytańni, bo ŭ tych punktach nie chapaje peŭnaha abstalavańnia dla efiektyŭnaha kantrolu nad rucham kantrabandy. I kali hetyja punkty zakryjucca, my zmožam tyja mahutnaści, jakija siońnia tam jość, nakiravać u inšyja miescy, uzmacniŭšy achovu našaj źniešniaj miažy», — adznačyŭ daradca prezidenta.
Pavodle słoŭ D. Urbonasa, rašeńnie ab zakryćci punktaŭ propusku «Ćviaračus» i «Šumskas» moža być pryniata ŭ najbližejšy čas. Adnak, jak padkreśliŭ jon, apošniaje słova ŭ hetym pracesie budzie za ŭradam.
«Heta rašeńnie ŭrada, z punktu hledžańnia pravavoha rehulavańnia ŭ zakonie ab dziaržaŭnaj miažy i achovie. Dakładna vyznačana prava ŭrada prymać takija rašeńni z ulikam situacyi ŭ intaresach nacyjanalnaj, hramadskaj biaśpieki i ŭ inšych metach», — skazaŭ daradca prezidenta.
Ciapier čytajuć
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam4444
Kamientary