Čutki pra niejki praces u brendavańni biełaruskich Geely pačali raspaŭsiudžvacca na pačatku viasny. Spačatku pradstaŭniki zavoda i dyleraŭ adkazvali ŭchilista. U kancy traŭnia, adnak, na sustrečy kłuba Geely pradstaŭnik SZAT «Biełdžy» zajaviŭ adnaznačna: budziem vypuskać mašyny pad ułasnym brendam. Učora źjavilisia pieršyja zdymki madeli z novymi šyldačkami, piša «Anłajnier».
Na pačatku krasavika Hienadź Śvidzierski, hiendyrektar SZAT «BiełDžy», u spravazdačy ab statystycy prodažaŭ za miesiac zhadaŭ:
«Zavod płanuje ŭ druhim kvartale pavialičyć pastaŭki dyleram, vyvieści na rynak novuju madel krasoviera, a taksama zajmacca padrychtoŭkaj vytvorčaści aŭtamabila pad ułasnym brendam». Apošniaja fraza asabliva pryciahnuła ŭvahu.
Hetuju infarmacyju paźniej paćvierdziŭ namieśnik dyrektara SZAT «Biełdžy» Siarhiej Chudaješka. Pavodle jaho słoŭ, byŭ raspracavany novy łahatyp (dźvie litary BG u firmovaj dla Geely ramcy na ciomnym fonie).
Chudaješka śćviardžaje, što ŭžo ŭ druhoj pałovie hoda buduć vypuščanyja pieršyja mašyny pad novym brendam BelGee.
«My ŭ Biełarusi daŭno chočam vypuścić svoj ułasny lehkavy aŭtamabil. Užo jość vopyt, vykarystoŭvajem sučasnyja technałohii. Sumiesna z kampanijaj Geely sioleta my zrobim pieršy krok, — zajaviŭ pradstaŭnik kampanii. —
Dumaju, my hatovyja da taho, kab na darohach Respubliki Biełaruś i nie tolki źjavilisia novyja aŭtamabili pad novym brendam. I heta budzie brend BelGee.
U druhim paŭhodździ vy ŭbačycie ŭpadabanuju madel, jakuju raniej nazyvali Coolray, pad novym imiem X50. Heta budzie pieršy krok na šlachu da stvareńnia ŭłasnaha aŭtamabila».
I voś źjavilisia fatahrafii, źniatyja na zavodzie «BiełDžy». Na ich dyrektar SZAT Hienadź Śvidzierski «ažyćciaviŭ pryjomku pieršaha aŭtamabila novaj madeli BelGee X50».
Jak možna pierakanacca, mašyna — toj samy Coolray, ale ź inšaj šyldačkaj brenda i nazvy madeli.
U cełym ža marka Geely stała lidaram rynku pa vynikach 2022 hoda i zastajecca takoj ciapier. Na jaje dolu prypadaje 72% ad usich pradadzienych novych lehkavych aŭtamabilaŭ.
Kamientary
https://d2accbiqacj5y8.cloudfront.net/ru/322511