Ci mohuć Biełaruski Čyrvony Kryž vyklučyć ź mižnarodnaj arhanizacyi?

Ekśpiertka ŭ halinie mižnarodnaha prava i pravoŭ čałavieka Kaciaryna Dejkała zaŭvažaje: jość dźvie arhanizacyi — Mižnarodny Kamitet Čyrvonaha Kryža i Mižnarodnaja fiederacyja Čyrvonaha Kryža. Fiederacyja — heta placoŭka dla ŭzajemadziejańnia i abmienu dośviedam nacyjanalnych tavarystvaŭ Čyrvonaha Kryža (ich 191). Mienavita jana adreahavała na situacyju z Šaŭcovym.

«MKČK reputacyjna, viadoma, zakranaje, ale treba razumieć, što Biełaruski Čyrvony Kryž nie źjaŭlajecca padraździaleńniem Mižnarodnaha Kamiteta. Jon uvachodzić u Fiederacyju. Tamu čysta apieracyjna, na ŭzroŭni administracyjnych rašeńniaŭ MKČK nie moža ŭpłyvać na Fiederacyju, heta roznyja arhanizacyi.

Asnoŭny orhan Fiederacyi — Hienieralnaja asambleja, jakaja składajecca z pradstaŭnikoŭ nacyjanalnych tavarystvaŭ. Adno tavarystva — adzin hołas. Tut budzie ŭsio zaležać ad taho, jak paviaduć siabie inšyja siabry Fiederacyi. Pavodle statuta siabra možna vyklučyć abo prypynić siabroŭstva. I dla taho, kab vyklučyć, treba 60% hałasoŭ siabroŭ Fiederacyi.

Pa sutnaści rašeńnie za nacyjanalnymi tavarystvami inšych krain», — kamientuje Kaciaryna Dejkała.

Ekśpiertka źviartaje ŭvahu: vidavočna parušeńnie asnoŭnaha pryncypu ruchu Čyrvonaha Kryža — pryncypu niejtralnaści ŭ dačynieńni da bakoŭ u vajnie. Astatniaje patrabuje dalejšaha vyvučeńnia.

Čym pahražaje vyklučeńnie? Biełaruski Čyrvony Kryž u takim razie pazbaviać finansavaj dapamohi, mahčymaści ŭdziełu ŭ prahramach, prava vykarystoŭvać emblemu Čyrvonaha Kryža i pad hetaj nazvaj isnavać.

Namieśnik kiraŭnika Abjadnanaha pierachodnaha kabinieta Pavieł Łatuška kaža, što jany źviartajuć uvahu mižnarodnych partnioraŭ na takija abstaviny.

«Razam z tym, inicyjatyva pa pryniaćci kankretnych mier reahavańnia pa hetym pytańni pavinna sychodzić u pieršuju čarhu ad tych, čyju reputacyju padryvajuć takija dziejańni i ŭ adnosinach da kaho ździajśniajucca mahčymyja złačynstvy. Ja ciapier maju na ŭvazie ŭ pieršuju čarhu ŭsie arhanizacyi, jakija ŭvachodziać u Mižnarodny ruch Čyrvonaha Kryža i Čyrvonaha Paŭmiesiaca, a taksama dziaržavu Ukrainu.

Možam tolki kanstatavać, što surjoznych krokaŭ, nakštałt vyklučeńnia Biełaruskaha tavarystva Čyrvonaha Kryža ź mižnarodnaha ruchu Čyrvonaha Kryža i Čyrvonaha Paŭmiesiaca, naŭrad ci možna pradbačyć. Takich precedentaŭ jašče nie było.

Adnak kali buduć ustanoŭleny fakty pramoha ŭdziełu BTČK mienavita ŭ masavym pieramiaščeńni ŭkrainskich dziaciej z terytoryi Ukrainy ŭ Biełaruś, dzie jany padviarhalisia ideałahičnamu pieravychavańniu (videa siaścior Hruździevych tut jarki prykład), to heta ŭžo adnaznačna možna razhladać jak vajennaje złačynstva, u jakim niepasredny ŭdzieł uziaŭ kiraŭnik BTČK».

Palityk dadaŭ, što pry atrymańni dokazaŭ jany buduć infarmavać Hienprakuraturu Ukrainy i ofis prakurora MUS.

• 28
• 0
• 3
• 4
• 1
• 1
• 4
• 0