Ukraina nie dazvoliła Biełarusi atrymać «kansultatyŭny status» pa Antarktycy

Biełaruś nie zmahła atrymać «kansultatyŭny status» pa Antarktycy, jaki nadzialiŭ by jaje pravam hołasu pa ŭsich kiraŭnickich pytańniach antarktyčnaha rehijonu. Jak paviedamlaje navukovaje vydańnie Research Professional News, na niadaŭnim pasiadžeńni pa hetym pytańni baki nie zmahli pryjści da kansensusu ŭ tym liku praz pazicyju Ukrainy i jaje sajuźnikaŭ.

Samo pasiadžeńnie prachodziła ŭ Finlandyi jašče 8 červienia. Na im udzielniki Dahavora pa Antarktycy, jaki byŭ padpisany ŭ 1959 hodzie, abmiarkoŭvali zajaŭku Biełarusi na atrymańnie prava hołasu ŭ spravach Antarktyki, jakuju taja padavała jašče ŭ 2021 hodzie. 

U vyniku baki abmierkavańnia paličyli, što Biełaruś zrabiła niedastatkova navukovaha ŭkładu ŭ antarktyčnyja daśledavańni i ŭ dadatak da hetaha razam z Rasijaj parušyła Statut AAN, padtrymaŭšy niezakonnaje vajennaje ŭvarvańnie va Ukrainu.

«Zhodna z Dahavoram ab Antarktycy, kansultatyŭny status i prava hołasu moža atrymać abo kraina-zasnavalnica Dahavora (ZŠA, Rasija i inšyja), abo kraina, jakaja pravodzić značny abjom daśledavańniaŭ u Antarktycy.

U vypadku ž ź Biełaruśsiu, niahledziačy na ​​iaje zajavy ab dastatkovaści jaje ŭkładu ŭ antarktyčnyja daśledavańni, daloka nie ŭsie ŭdzielniki pahadzilisia, što heta adpaviadaje rečaisnaści. Akramia taho, pa infarmacyi ŭkrainskaha boku, z terytoryi Biełarusi padčas vajny byŭ naniesieny rakietny ŭdar pa Nacyjanalnym antarktyčnym navukovym centry ŭ Kijevie, što absalutna niedapuščalna», — piša Research Professional News sa spasyłkaj na minułaje pasiadžeńnie i asabisty kamientar vydańniu ad pradstaŭnikoŭ Ukrainy.

Hetaje rašeńnie vydańniu paśpieli prakamientavać i pradstaŭniki navukovaj supolnaści Biełarusi. Častka ź ich pastaviłasia da vynikaŭ pasiadžeńnia z razumieńniem, bo «ŭkład Biełarusi ŭ antarktyčnyja daśledavańni sapraŭdy nievialiki i mižnarodnaja supolnaść viedaje heta lepš». 

Razam z tym znajšlisia i tyja, chto raskrytykavaŭ hetaje rašeńnie. 

«Heta niespraviadliva. Biełaruś pravodzić značnuju daśledčuju dziejnaść u Antarktycy i adpaviadaje ŭsim kryteryjam dla atrymańnia kansultatyŭnaha statusu», — zajaviŭ Jury Hihiniak, supracoŭnik Navukova-praktyčnaha centra Nacyjanalnaj akademii navuk Biełarusi pa bijaresursach.

Sama Akademija navuk i MZS Biełarusi admovilisia davać kamientary vydańniu pa hetym pytańni. Adznačym, što Biełaruś vałodaje adnoj navukovaj antarktyčnaj stancyjaj u rehijonie (stancyja «Hara Viačerniaja») i z 2006 hoda źjaŭlajecca ŭdzielnikam Dahavora ab Antarktycy, ale biez prava hołasu.

• 12
• 0
• 12
• 1
• 0
• 1
• 0
• 0