Zialenskamu nie dazvolili vystupić sa zvarotam pierad finałam Jeŭrabačańnia
Arhanizatary Jeŭrabačańnia-2023 adkazali admovaj na prapanovu Uładzimira Zialenskaha vystupić ź videazvarotam u finale konkursu, jaki projdzie 13 maja. Prezident Ukrainy chacieŭ vystupić pa videasuviazi pierad šmatmiljonnaj aŭdytoryjaj, kab zaklikać nadalej padtrymlivać Ukrainu ŭ baraćbie z ahresijaj RF.
Adnak Jeŭrapiejski viaščalny sajuz (EBU), jaki źjaŭlajecca arhanizataram Jeŭrabačańnia ŭ Livierpuli razam ź Bi-bi-si, adchiliŭ prośbu ŭkrainskaha prezidenta, piša «Ukrainskaja praŭda».
«Piesienny konkurs Jeŭrabačańnie — heta mižnarodnaje zabaŭlalnaje šou i padparadkoŭvajecca strohim praviłam i pryncypam, jakija byli ŭstalavanyja z momantu jaho stvareńnia. Adnym z hałoŭnych pryncypaŭ konkursu jość niepalityčny charaktar mierapryjemstva. Hety pryncyp zabaraniaje mahčymaść rabić palityčnyja ci padobnyja zajavy ŭ ramkach konkursu. Prośba Zialenskaha źviarnucca da hledačoŭ na Jeŭrabačańni choć i była zroblenaja z dobrymi namierami, ale, na žal, nie moža być zadavolenaja kiraŭnictvam Jeŭrapiejskaha viaščalnaha sajuza, bo heta supiarečyć praviłam mierapryjemstva», — adkazała EBU.
Insajdary Bi-bi-si paviedamili Times, što «składanyja i dalikatnyja» pieramovy ŭsio jašče praciahvajucca, tak jak arhanizatary Jeŭrabačańnia aścierahajucca, što admova stvoryć precedent u budučyni.
Zrešty, pavodle stanu na 11 maja mahčymaść zvarotu Zialenskaha ŭvažałasia za «nieprymalnuju».
Ciapier čytajuć
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary