U Ispanii ŭpieršyniu ŭ śviecie praviali całkam rabatyzavanuju transpłantacyju lohkich
Ispanskija miedyki paśpiachova praviali pieršuju ŭ śviecie całkam rabatyzavanuju transpłantacyju lohkich. Dla vykanańnia apieracyi chirurhi ŭ Barsiełonie vykarystoŭvali robata z čatyrma «rukami» pad nazvaj «Da Vinčy», paviedamlaje «Ukrainskaja praŭda».
Pacyjentam byŭ 65-hadovy mužčyna pa imieni Ksaŭjer. U jaho dyjahnastavali lohačny fibroz — niebiaśpiečnaje dla žyćcia zachvorvańnie lohkich, jakoje vyklikaje ich rubcavańnie.
Jak tłumačać miedyki, heta zachvorvańnie paražaje ludziej stałaha vieku i redka sustrakajecca ŭ tych, kamu da 50 hadoŭ. Čaściej za ŭsio achviarami stanoviacca mužčyny.
Pierad apieracyjaj chirurhi vydalili pavietra z donarskaha lohkaha, kab pamienšyć pamier orhana. U vyniku jaho ŭdałosia źmiaścić u hrudnuju kletku praz razrez šyrynioj usiaho 8 sm.
Kala rebraŭ byli zroblenyja nievialikija nadrezy dla raźmiaščeńnia «ruk» robata i 3D-kamier, dziakujučy jakim chirurhi zmahli ahledzieć paražninu ŭnutry.
Miedyki śćviardžajuć, što novaja technałohija — mienš balučaja dla pacyjenta i źnižaje ryzyku paślaapieracyjnaj infiekcyi, pakolki rana lohka zakryvajecca.
«My ličym, što hety mietad palepšyć jakaść žyćcia pacyjentaŭ, skarocić paślaapieracyjny pieryjad i pamienšyć bol», — skazaŭ doktar Albierta Džaŭrehi, zahadčyk adździaleńnia tarakalnaj chirurhii i transpłantacyi lohkich univiersiteckaj balnicy Val De'Chiebron.
Dziakujučy tamu, što paślaapieracyjny razrez byŭ nievialikim, Ksaŭjeru pryjšłosia prymać tolki paracetamoł. A tradycyjnaja transpłantacyja lohkich zvyčajna patrabuje paślaapieracyjnaha lačeńnia značna bolš mocnymi abiazbolvalnymi, padkreślivajuć miedyki.
«Z momantu, kali ja pryjšoŭ u siabie i pračnuŭsia ad ahulnaha narkozu, ja nie adčuvaŭ bolu», — raspavioŭ pacyjent.
Robat «Da Vinčy» byŭ raspracavany amierykanskaj karparacyjaj Intuitive Surgical ŭ 2000 hodzie. Ciapier jaho vykarystoŭvajuć dla lačeńnia sotniaŭ tysiač pacyjentaŭ. Sistema nie vykonvaje apieracyju sama, a tranśluje ruchi ruk chirurha ŭ realnym časie.
Da apisanaha vypadku robata vykarystoŭvali dla pierasadki lohkich tolki adzin raz — u balnicy Łos-Andželesa (ZŠA). Adnak tady «Da Vinčy» pravioŭ apieracyju tolki častkova, a lohkaje pa-raniejšamu ŭstaŭlali ŭ hrudnuju kletku tradycyjnym sposabam.
Pa słovach doktara Džaŭrehi, inšym pacyjentam sa śpisu čakańnia apieracyi pa transpłantacyi lohkich ciapier budzie prapanavana novaja technika.
Jon dadaŭ, što spadziajecca, što ŭ budučyni novy padychod da transpłantacyi lohkich stanie suśvietnym standartam.
Daśledavańni aśpirynu vyjavili novyja cikavyja fakty
Choład moža dapamahčy ŭ lačeńni chvaroby Alchiejmiera i Parkinsana
Navukoŭcy zmahli spynić praces stareńnia ŭ myšej i navučylisia kiravać hetym pracesam. A što nakont ludziej?
Kamientary