Papularnaść K-pop škodzić ekałohii płaniety — daśledavańnie
Vielizarny ažyjataž vakoł paŭdniovakarejskich hurtoŭ pryvodzić da pavieličeńnia prodažaŭ kampakt-dyskaŭ z adpaviednymi pieśniami. Adnak sami dyski pakupnikoŭ zusim nie cikaviać.
Vysoki ŭzrovień prodažaŭ kampakt-dyskaŭ z albomami paŭdniovakarejskich hurtoŭ pryvodzić da takoha ž vysokaha ŭzroŭniu zabrudžvańnia navakolnaha asiarodździa. Pra heta jašče 14 krasavika paviedamiŭ navinavy partał Semafor sa spasyłkaj na daśledavańnie Karejskaha ahienctva spažyŭcoŭ (KCA) i miascovych ekołahaŭ.
Pavodle infarmacyi KCA, bolš za pałovu (53%) isnujučych fanataŭ muzyčnaha žanru K-pop kuplajuć kampakt-dyski z adpaviednymi pieśniami tolki dla taho, kab atrymać fatahrafii, płakaty, nalepki i inšy mierč ź ich lubimymi vykanaŭcami.
Sami ž dyski pry hetym masava vykidvajucca navat biez adzinaha vykarystańnia pa pryznačeńni, bo jany źjaŭlajucca tolki padstavaj dla atrymańnia mierču (asabliva fatahrafij).
«Zhodna z daśledavańniem KCA, prodažy fizičnych kampakt-dyskaŭ tolki ŭ adnoj Paŭdniovaj Karei vyraśli z 25 miljonaŭ ekzemplaraŭ u 2019 hodzie da 77 miljonaŭ u 2022 hodzie. Adnym z asnoŭnych faktaraŭ takoha rostu prodažaŭ K-pop źjaŭlajucca ekskluziŭnyja mierčavyja tavary, jakija iduć u kamplekcie z dyskami», — adznačaje partał Semafor.
U jakaści prykładu pryvodzicca znakamity paŭdniovakarejski hurt Seventeen, dyski z apošnimi pieśniami jakoha pradajucca ŭ naborach razam z fotaalbomami, bukletami z tekstami kampazicyj, imiannymi stykierami i mnohim inšym.
Ekołahi ž u asobie Karejskaj fiederacyi ekałahičnaha ruchu papiaredžvajuć, što płastykavyja kampakt-dyski vielmi składana druhasna pierapracavać, z-za čaho mnohija śmiećcievyja zvałki mocna pierapaŭniajucca.
Kamientary
Darujcie, ale heta zvyčajny rasizm. Do better, kali łaska.