Kamisija pa viartańni rassyłaje rodnym palituciekačoŭ instrukcyi nakont taho, jak tyja mohuć viarnucca — voś što ŭ ich
Hetak kamisija Hienieralnaj prakuratury padbivaje rodnych palituciekačoŭ, kab tyja ŭzialisia pierakonvać ich viarnucca.
Adzin z emihrantaŭ dasłaŭ «Našaj Nivie» zvarot, adrasavany svajačcy. U im davodzicca, što jon «maje prava źviarnucca ŭ kamisiju pa razhladzie zvarotaŭ» da 31 śniežnia 2023 hoda.
Jak vynikaje z dopisu, ad emihranta siarod inšaha patrabujecca list pakajańnia, u jakim jon pavinien paviedamić ab čystasardečnym raskajańni za ŭčynienaje pravaparušeńnie, publična vybačycca i kampiensavać škodu.
Pa viartańni ž na radzimu jon abaviazany trymacca Kanstytucyi, vykonvać zakony i inšyja narmatyŭnyja pravavyja akty, a taksama pavažać dziaržaŭnyja simvały, nacyjanalnyja tradycyi dy śviadoma i aktyŭna vykonvać svoj hramadzianski abaviazak.
«Takaja kamisija raźličvaje, što svajačka stanie pierakonvać mianie viarnucca, ale jana viedaje, što mianie čakaje. Raniej rodnyja atrymali list ź milicyi, u jakim havaryłasia, što administracyjny pieraśled suprać mianie spynieny. Ale ja źjechaŭ, bo byŭ asudžany na «chimiju» pavodle kryminalnaha prysudu. Pra jaho havorki niama», — kamientuje prapanovu viarnucca emihrant.
Kamisija prosić dasyłać pakajannyja listy na adras Hienieralnaj prakuratury piśmova albo na elektronnuju poštu. Dazvolena pisać na biełaruskaj movie.
Ukaz pra stvareńnie kamisii pa viartańni Łukašenka padpisaŭ sioleta na pačatku lutaha. Jaje ŭznačaliŭ hienprakuror Andrej Švied. U jaje składzie siarod inšych staršynia KHB Ivan Cierciel i prapahandyst Ryhor Azaronak.
1 krasavika Švied zajaviŭ, što ŭ kamisiju pa viartańni biełarusaŭ, jakija zjechali, jakoj jon kiruje, pastupiła ŭžo 56 zajaŭ. Jon zapeŭniŭ, što ŭ najbližejšy čas pieršuju častku zvarotaŭ razhledziać.
«Naša Niva» — bastyjon biełaruščyny
PADTRYMAĆHladzicie taksama:
Ukaz pra «kamisiju pa viartańni» skłali tak, kab jon ničoha nie harantavaŭ. Voś što heta dakazvaje
«Paŭzkom, na kaleniach». Što Łukašenka abiacaŭ na minułym pasłańni narodu i svaim deputatam
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary
https://d2accbiqacj5y8.cloudfront.net/313691