Kanstancinopalski patryjarchat padpisaŭ pahadnieńnie ź Litvoj. Jano tyčycca i biełaruskich viernikaŭ
Razmova padčas vizitu išła ab zasnavańni miascovaj struktury Suśvietnaha patryjarchatu. Sustreča skončyłasia padpisańniem dakumientaŭ, piša «Radyjo Svaboda».
Vizit Suśvietnaha (Kanstancinopalskaha) patryjarcha Varfałamieja ŭ Vilniu skončyŭsia padpisańniem pahadnieńnia ź litoŭskimi ŭładami. Pahadnieńnie praduhledžvaje kankretnyja kroki pa instytucyjalizacyi ŭ krainie struktur Suśvietnaha patryjarchatu, adkryvajučy dla ich mahčymaści budavać i biazvypłatna arandavać u dziaržavy chramavyja pamiaškańni, ažyćciaŭlać misijanierskuju, adukacyjnuju i dabračynnuju dziejnaść.
Kliryki Suśvietnaha patryjarchatu ŭ Litvie atrymajuć taki ž pravavy status, jak i śviatary inšych tradycyjnych kanfiesij Litvy.
Dakumient z Kanstancinopalskim patryjarchatam padpisvała premjer-ministarka Litvy Inhryda Šymanicie. Jana padkreśliła, što rašeńnie Suśvietnaha patryjarchatu zadavolić apielacyju piaci litoŭskich pravasłaŭnych śviataroŭ, adnavić ich relihijny status i pryniać u Carkvu-Maci paśla rašeńnia patryjarcha Maskoŭskaha Kiryła vyklučyć ich z duchavienstva, — heta važny krok u zabieśpiačeńni relihijnaj svabody ŭ Litvie.
Taksama jana padkreśliła, što rašeńnie ab viartańni Ekumieničnaha patryjarchatu ŭ Litvu moža pryniać tolki jon sam. Adnak jana adznačyła, što mahčymaść vyznavać svaju vieru biez kanfliktu z sumleńniem važnaja nie tolki dla pravasłaŭnych hramadzian Litvy hrečaskaha i ŭkrainskaha pachodžańnia, ale i dla ŭkraincaŭ, jakija ŭciakli ad raźviazanaj Rasijaj vajny, i dla biełarusaŭ, jakija praz represii na radzimie pierajechali ŭ Litvu.
Padčas pajezdki Varfałamiej sustreŭsia nie tolki z pradstaŭnikami ŭłady, ale i z adnoŭlenymi ŭ sanie śviatarami i viernikami.
Raniej z prośbaj ab zasnavańni miascovaj struktury Suśvietnaha patryjarchatu da patryjarcha Varfałamieja źviartalisia roznyja nacyjanalnyja hramady Litvy, u tym liku biełaruskaja i ŭkrainskaja.
U karystańnie pravasłaŭnych viernikaŭ Kanstancinopalskaha patryjarchatu ŭ Vilni pieradali chram u honar śviatoha Mikałaja na Łukiškach. Heta adzin ź niamnohich kultavych budynkaŭ, što histaryčna naležali Pravasłaŭnaj carkvie, ale nie byli pieradadzienyja va ŭłasnaść miascovaj jeparchii RPC, napisaŭ napiaredadni vizitu ŭ svaim telehram-kanale ajciec Alaksandr Šramko.
Taksama jon paviedamiŭ, što napiaredadni vizitu patryjarcha Kanstancinopalskaha ŭpieršyniu liturhija ŭ sasłužeńni śviataroŭ Kanstancinopalskaha patryjarchatu ŭ Vilni prajšła ŭ budynku nazvanaha chrama.
«Arabski šejch zasunuŭ dalary ŭ kišeniu». Błohier Vadimati Jermašuk ciapier pracuje achoŭnikam luksavych bucikoŭ3
Kamientary