U žycharki Drahičyna, pamierłaj ad pnieŭmanii, łabaratorna paćvierdžany virus hrypu A(N1N1)

U 37‑hadovaj žycharki Drahičyna, pamierłaj ad pnieŭmanii 30 kastryčnika, łabaratorna paćvierdžany virus hrypu A(N1N1).

Pra heta paviedamiŭ hałoŭny dziaržaŭny sanitarny ŭrač Bresckaj vobłaści Aleh Arnautaŭ na pres‑kanfierencyi ŭ Breście 3 listapada.

Heta pieršy aficyjna paćvierdžany ŭ Biełarusi vypadak śmierci, vyklikanaj virusam hrypu A(N1N1).

Pavodle słoŭ Arnautava, najaŭnaść virusu paćvierdziła pieršaje łabaratornaje daśledavańnie, jakoje było praviedziena virusałahičnaj łabaratoryjaj Bresckaha abłasnoha centra hihijeny, epidemijałohii i hramadskaha zdaroŭja.

«Ciapier materyjały znachodziacca ŭ nacyjanalnym centry hrypu Respublikanskaha navukova‑daśledčaha instytuta epidemijałohii i mikrabijałohii, dzie buduć abo paćvierdžany vyniki našych daśledavańniaŭ, abo admienieny», — paviedamiŭ śpiecyjalist.

Pavodle słoŭ Arnautava, u dački pamierłaj žančyny virus hrypu A(H1N1) pakul nie vyjaŭleny.

Šasnaccacihadovaja školnica prachodzić lačeńnie ŭ stacyjanary.

Jak paviedamiŭ dziaržaŭny sanitarny ŭrač Drahičynskaha rajona Michaił Stachiejka, 37‑hadovaja žycharka Drahičyna, nastaŭnica Tołkaŭskaj bazavaj škoły, źviarnułasia pa miedycynskuju dapamohu 26 kastryčnika. Jana skardziłasia na vysokuju tempieraturu, hałaŭny bol, słabaść i paviedamiła, što zachvareła 23 kastryčnika.

U toj ža dzień žančyna była špitalizavana ŭ Drahičynskuju centralnuju rajonnuju balnicu, dzie joj pastavili dyjahnaz «niešpitalnaja dvuchbakovaja polisiehmientarnaja pnieŭmanija».

Chvoraj pryznačyli antybakteryjalnaje i supraćvirusnaje lačeńnie. 28 kastryčnika jaje kansultavali try śpiecyjalisty z Bresta.

Niahledziačy na namahańni miedykaŭ, 30 kastryčnika ŭ 1.45 chvoraja pamierła. Praviedzienaje anatamavańnie paćvierdziła pastaŭleny miedykami dyjahnaz.

Ranicaj 30 kastryčnika adpaviednyja materyjały byli nakiravany ŭ Brest dla praviadzieńnia łabaratornych daśledavańniaŭ.

Jak padkreśliŭ Stachiejka, ustanoŭlena, što 10 kastryčnika žančyna znachodziłasia va Ukrainie, u horadzie Kovieli. U zahinułaj byŭ šerah spadarožnych zachvorvańniaŭ, jakija mahli ŭskładnić ciačeńnie pnieŭmanii.

28 kastryčnika była špitalizavana 16‑hadovaja dačka žančyny. Jaje stan zdavalniajučy i nie vyklikaje aściaroh. 31 kastryčnika ŭ Brest u virusałahičnuju łabaratoryju byli nakiravany analizy, uziatyja ŭ školnicy, a taksama va ŭsich ludziej, jakija kantaktavali ź joju i jaje zahinułaj maci i ŭ jakich byli vyjaŭleny simptomy VRVI. Na hety čas vyniki łabaratornych daśledavańniaŭ analizaŭ hetych asob nieviadomy.

Usie naviny na temu epidemii hrypu, parady, daviedki i žarty

• 0
• 0
• 0
• 0
• 0
• 0
• 0
• 0