Ciapier aficyjna: mužčyny z kompleksam małoha pienisa čaściej vybirajuć spartyŭnyja aŭtamabili

Daśledčyki z Univiersiteckaha kaledža Łondana vyjavili, što ekśpierymientalnaje manipulavańnie mužčynami (asabliva pažyłymi) z metaj unušeńnia im, što ŭ ich adnosna maleńki pienis, vyklikała ŭ apošnich pavieličeńnie žadańnia dla raskošnych spartyŭnych aŭtamabilaŭ.

U ekśpierymiencie ŭdzielničała 195 čałaviek va ŭzroście ad 18 da 74 hadoŭ. Jon praciahvaŭsia ŭsiaho 8 chvilin. Sapraŭdnaj mety ŭdzielniki nie viedali. Im skazali, čto ekśpierymient zaklučajecca ŭ vyvučeńni taho, jak ludzi zapaminajuć fakty padčas pakupki roznych pradmietaŭ. Tamu ŭdzielnikaŭ paprasili pasprabavać zapomnić fakty dla bolš poźniaha testa pamiaci.

Kožnamu ŭdzielniku było prapanavana 12 raundaŭ. U kožnym ź ich na manitory na praciahu 7 siekund pakazvałasia kartka ź niejkim faktam. Zatym jana źmianiałasia vyjavaju niejkaha pradmieta. Udzielnik ekśpierymienta pavinien byŭ z dapamohaj pieramiaščeńnia paŭzunka acanić svajo žadańnie mieć hety pradmiet.

6 faktaŭ z 12 byli padabrany takim čynam, kab manipulavać samaacenkaj. Paśla ich pakazvalisia pradmiety raskošy (šampanskaje, piacizorkavy atel, spa-adpačynak, hadzinik Rolex, dyzajnierskija soncaachoŭnyja akulary, spartyŭny aŭtamabil). Spartyŭnych aŭtamabilaŭ było šeść varyjantaŭ. Ich vyjavy varjiravalisia.

Dla taho, kab manipulavać samacenkaj, pryvodzilisia niepraŭdzivyja fakty. Naprykład, nizkuju samaacenku pavinna była vyklikać infarmacyja kštałtu:

«Kala 76 % ludziej kožny miesiac adkładajuć peŭnuju sumu hrošaj ŭ źbieražeńni» ci «93,37% žycharoŭ Vialikabrytanii ŭ minułym hodzie rabili achviaravańni na dabračynnaść». Dla stymulavańnia vysokaj samaacenki ličby ŭ hetych «faktach» byli zamienienyja na, adpaviedna, 5 % i 15,37%.

U klučavym raundzie adnym udzielnikam pryvodziŭsia fakt ab tym, što siaredni pamier erehiravanaha pałavoha člena składaje 18 sm. Heta pavinna było vyklikać ich nizkuju samaacenku. Druhaja hrupa atrymlivała fakt ab tym, što siaredni pamier składaje 12 sm. Paśla hetaha pakazvałasia kartka sa spartyŭnym aŭtamabilem i prapanoŭvałasia acanić svajo žadańnie im vałodać.

Vyniki pakazali, što mužčyny, jakija ličyli, što ŭ ich adnosna mały pienis, demanstravali bolšaje žadańnie mieć spartyŭny aŭtamabil. Adnačasova vučonyja zaŭvažajuć, što ŭ hrupie maładziejšych za 29 hadoŭ nijakaj suviazi pamiž ujaŭnym pamieram pienisa i žadańniem raskošnaha aŭtamabila nie było dakazana. Uzajemasuviaź była vidavočnaj tolki dla ludziej starejšych za 30 hadoŭ.

Vučonyja zaŭvažyli jašče adnu tendencyju. Dla hrupy mužčyn ź vialikim pienisam acenka spartyŭnych aŭtamabilaŭ z uzrostam źnižałasia. A voś u druhoj hrupy takaja suviaź zachoŭvałasia.

Dla taho, kab pravieryć, ci ŭpłyvaje ŭzrovień samaacenki na žadańnie nabyć inšyja pradmiety raskošy, ekśpierymient byŭ paŭtorany ŭžo biez demanstracyi aŭtamabilaŭ. U hetym vypadku nijakich zakanamiernaściaŭ nie było vyjaŭlena.

Daśledavańnie moža mieć praciah. «Kali b my manipulavali takimi ž mocnymi faktarami, jak, naprykład, ujaŭleńnie mužčyn ab svaim intelekcie ci bahaćci, ci vyjavili b my padobny ŭpłyŭ na rejtynhi praduktaŭ?» — zadajuć sabie pytańnie vučonyja.

Čytać jašče:

Kali nie vijahra, to što? 

• 8
• 0
• 25
• 4
• 4
• 1
• 4
• 0