U Homieli pačynajecca sud za zdymak aeradroma ŭ Ziabraŭcy i «zdradu dziaržavie»
Homielski abłasny sud 3 studzienia pačynaje razhlad kryminalnaj spravy žychara vioski Ziabraŭka Homielskaha rajona Jaŭhiena Hłuškova, jakoha padazrajuć u zdradzie dziaržavie (č. 1 art. 356) i sadziejničańniu ekstremisckaj dziejnaści (č. 1 art. 361-1 Kryminalnaha kodeksa), paviedamlaje «Viasna».
Sudovy praces pryznačany vieści sudździa Aleh Charoška.
32-hadovy Jaŭhien Hłuškoŭ byŭ zatrymany jašče ŭ žniŭni, z taho času žychara Homielskaha rajona trymajuć u SIZA-3.
Jon apošni čas žyŭ u vioscy Ziabraŭka Homielskaha rajona. Mienavita kala jaje znachodzicca vajskovy aeradrom, na jakim z pačatku vajny raźmiaščajucca rasijskija vajskoŭcy. Adtul byli zafiksavanyja zapuski rakiet pa ŭkrainskaj terytoryi. Adtul ža vylatali vajskovyja samaloty.
Jaŭhien skončyŭ Vieterynarnuju akademiju ŭ Viciebsku, adsłužyŭ u biełaruskim vojsku — u Asobnaj słužbie aktyŭnych mierapryjemstvaŭ (ASAM), śpiecnazie pamiežnych vojskaŭ. Heta adno z samych niepubličnych padraździaleńniaŭ biełaruskaha vojska. Paśla słužby Hłuškoŭ peŭny čas žyŭ va Ukrainie (jahonyja baćki — etničnyja ŭkraincy, daŭno žyvuć u Biełarusi), hraŭ tam u muzyčnym hurcie. Akramia hetaha, Hłuškoŭ taksama žyŭ u Kitai — u tym liku padčas pratestaŭ u Biełarusi ŭ žniŭni 2020 hoda. Źjechaŭ z-za kavidnych abmiežavańniaŭ.
Pa infarmacyi niekatorych ŚMI, paśla taho jak u noč z 10 na 11 žniŭnia na aeradromie ŭ Ziabraŭcy zdaryŭsia incydent, pačalisia pravierki miascovych. U Jaŭhiena ŭ telefonie znajšli stary zdymak aeradroma, jaki jon rabiŭ z drona. I jašče znajšli kantakty roznych ukraincaŭ. Hetaha było dastatkova, kab jaho zatrymać.
Zhodna z materyjałami spravy, abvinavačany naŭmysna dapamoh zamiežnaj dziaržavie ŭ praviadzieńni dziejnaści na terytoryi Homielskaha i Rečyckaha rajonaŭ, zahadzia nakiravanaj na pryčynieńnie škody nacyjanalnaj biaśpiecy Respubliki Biełaruś.
U pryvatnaści, źbiraŭ, fiksavaŭ i analizavaŭ infarmacyju raźviedvalnaha charaktaru pra abjekty vajennaj infrastruktury i techniki, u tym liku pra biełaruskija vajennyja abjekty. Paśla z vykarystańniem miesiendžara Telegram pieradaŭ atrymanuju infarmacyju ŭ čat-bot, kantralavany zamiežnaj arhanizacyjaj.
Pa artykule 356 Kryminalnaha kodeksa Hłuškovu moža pahražać da 15 hadoŭ źniavoleńnia.
Sud prachodzić u zakrytym režymie.
Kamientary