Źjaviłasia mietadyčka pra toje, jak rasijskija prapahandysty pavinny raspaviadać pra vajennaje stanovišča ŭ Rasii
Uładzimir Pucin 19 kastryčnika padpisaŭ ukaz, pavodle jakoha na anieksavanych terytoryjach Ukrainy ŭvodzicca «poŭnaje» vajennaje stanovišča, a ŭ astatniaj Rasii — «častkovaje». Jak vyśvietliła «Mieduza», adrazu paśla hetaha dziaržaŭnyja i praŭładnyja ŚMI atrymali čarhovuju mietadyčku z Kramla — pra toje, jak treba raspaviadać hledačam i čytačam pra pucinski ŭkaz.
Novyja «rekamiendacyi» pačynajucca z klučavoha ŭkazańnia dla prapahandy: «Važna supakoić aŭdytoryju — ničoha istotnaha nie pamianiałasia!»
U paćvierdžańnie hetaha tezisa prapahandysty pavinny raskazać, što vajennaje stanovišča abvieščana «tolki ŭ čatyroch terytoryjach» (heta značyć u anieksavanych ukrainskich rehijonach), dzie jano albo ŭžo było ŭviedziena da «dałučeńnia da Rasii», albo «dziejničała pa faktyčnym stanoviščy rečaŭ» (heta i praŭda tak).
Abmiežavańni, jakija ŭvodziacca ŭ inšych rehijonach, «rekamiendujecca» tłumačyć kłopatam ab «abaronie krytyčna važnaj infrastruktury».
U cełym ža administracyja prezidenta (AP) RF «raić» prapahandzie pravieści paralel pamiž uviadzieńniem vajennaha stanovišča i rasijskim dośviedam baraćby z kavidam. Tady, jak i ciapier, rasijskija hubiernatary atrymali dadatkovyja paŭnamoctvy, a na fiederalnym uzroŭni kaardynacyjaj pracy zajmalisia premjer Michaił Mišuścin i mer Maskvy Siarhiej Sabianin.
U tekście, padrychtavanym u AP, prapahandystam «rekamiendujuć» zrabić akcent na tym, što ciapier čynoŭniki zojmucca «mabilizacyjaj pramysłovaści, aryjentavańniem ekanomiki na pracu pad zadačy armii i mierami padtrymki mabilizavanych i ich siemjaŭ». Asobna ŭ mietadyčcy Kramla adznačana, što heta budzie supravadžacca «skaračeńniem biurakratyi».
«Vykarystoŭvajecca vopyt baraćby z karonavirusam, kali usio mianiałasia chutka», — padkreślili składalniki dakumienta klučavy tezis.
Prapahandysty — jak i sam Uładzimir Pucin — uvieś čas śćviardžajuć, što Rasija vielmi efiektyŭna spraviłasia z pandemijaj. Naprykład, u 2021 hodzie Pucin razvažaŭ pra heta tak:
Tam [na Zachadzie] vysoki ŭzrovień achovy zdaroŭja i pramysłovaści, dasiahnieńni vydatnyja, nam jašče daloka pa niekatorych napramkach da ich, ale heta dla peŭnaj publiki. A ŭ nas — dla pieravažnaj bolšaści nasielnictva. I zdolnaści da mabilizacyi ŭ ich niama, jak akazałasia, u nas lepšaja. Mabilizacyja ŭsioj sistemy achovy zdaroŭja i pramysłovaści [u Rasii] apynułasia prosta nieparaŭnalna vyšejšaja, čym u jeŭrapiejskich krainach i Štatach, tam naohuł prosta razvał niejki.
Hetaja adznaka maje mała ahulnaha z realnaściu. Jak nieadnarazova raspaviadałasia, Rasija pravaliła kampaniju vakcynacyi (choć vielmi rana zmahła vyrabić vakcynu); pry hetym ułady z ekanamičnych mierkavańniaŭ admovilisia ŭvodzić žorstkija abmiežavańni, jakija mahli b zhładzić bolšuju častku «chvalaŭ» epidemii. U vyniku, pa padlikach navukoŭcaŭ, śmiarotnaść u Rasii ad karanavirusa apynułasia adnoj z samych vysokich u śviecie, jak u absalutnym vyražeńni (liškavaja śmiarotnaść — kala 1,2 miljona čałaviek), tak i na dušu nasielnictva (bolš 800 na 100 tysiač čałaviek).
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak6
Kamientary