10 piesień pa-biełarusku, jakija možna słuchać i śpiavać ź dziciom

Pačniem z kłasičnaj «Kałychanki», na jakoj vyrasła nie adno pakaleńnie dziaciej. Hetaja pieśnia zaviaršaje adnajmiennuju i najstarejšuju ŭ Biełarusi štodzionnuju dziciačuju pieradaču, jakaja vychodzić z 1981 hoda. Muzyku dla «Kałychanki» napisaŭ Vasil Rainčyk, słovy (usiaho za hadzinu) — paet Hienadź Buraŭkin. U 2006 hodzie «Kałychanku» sprabavali zamianić inšaj pieśniaj, ale jana pratrymałasia ŭ efiry tolki kala hoda, bo biełaruskija dzieci nie pažadali raźvitvacca sa zvykłym śpievam.

Jašče adna viersija «Kałychanki» ad Rainčyka i Buraŭkina. Ale, u adroźnieńnie ad kłasičnaha varyjantu, vykonvajuć jaje nie «Vierasy», a opiernaja zorka Marharyta Laŭčuk razam z Andrejem Pavukom. U ich dueta čaściej naradžajucca satyryčnyja pieśni, ale ž i «Kałychanka» ad Laŭčuk hučyć vielmi pryhoža, piaščotna i dušeŭna.

Ci možna sabie takoje ŭjavić, kab Źmicier Vajciuškievič pracavaŭ razam z Łarysaj Hrybalovaj? Heta było realna ŭ nulavyja, kali vyjšła kałychanka pad nazvaj «Śpi, maja kvietačka», zapisanaja dla dziciačaha fonda AAN JUNISEF. Hetuju kałychanku praśpiavali mamy sa stažam — Łarysa Hrybalova i Tamara Lisickaja, taksama ŭ śpievie čuvać hałasy Źmitra Vajciuškieviča i Ksienii Minčanki. Styl u klipa nieardynarny i moža krychu nahadać roliki Merylina Mensana taho ž času.

A heta — užo solnaja praca Źmitra Vajciuškieviča. Jaje słavuty biełaruski śpiavak zapisaŭ dla alboma «Viasiołka nad plosam», stvoranaha na vieršy paeta Alaksieja Pysina. Aproč Vajciuškieviča, u prajekcie paŭdzielničali Lavon Volski, Śviatłana Bień, Naviband, Pafnuci, Saša Zacharyk, Iryna Staravojtava i Hanna Šarkunova.

Pryhožuju «Kałychanku ź miesiačykam» vykanaŭ minski duet VAL — pradstaŭniki Biełarusi na Jeŭrabačańni-2020, jakoje nie adbyłosia praz toje, što pačałasia pandemija kavidu. Słovy dla pieśni — heta vierš Kastusia Sieviarynca. Cikavostka: mienš čym praz dva miesiacy paśla vychadu «Kałychanki ź miesiačykam» Uład i Lera, udzielniki VAL, stali baćkami dvajniatak, Marka i Miry.

«Jedźma dalej» — heta biełaruskamoŭnaja viersija viadomaj dziciačaj pieśni Wheels on the Bus, stvoranaja studyjaj ahučki Gavarun. Isnuje šmat viersij hetaj kampazicyi na roznych movach, i navat adzin tolki anhłamoŭny aryhinał maje bolš za 10 miljardaŭ prahladaŭ na jutubie. Tak što Wheels on the Bus — sapraŭdny dziciačy chit.

Jašče adna kałychanka ŭ vykanańni Źmitra Vajciuškieviča (nie dziviciesia — u hetaha vykanaŭcy jość ceły albom kałychanak). U hety raz słuchajem śpieŭ na vierš Leanida Drańko-Majsiuka.

«Śpić nad lesam abłačynka…» Hetaja kałychanka bolš viadomaja ŭ vykanańni Leanida Bartkieviča, ale kaliści jaje praśpiavaŭ i viadomy śpiavak biełaruskaj emihracyi Dančyk. Aŭtar słovaŭ dla kałychanki — biełaruski paet Leanid Prančak.

Jość na Youtube kanał ź biełaruskamoŭnym karaokie, dzie znojducca i dziciačyja pieśni. Adna ź ich — «Jalinačka», pierakład viadomaha śpievu «Maleńkoj jołočkie chołodno zimoj».

Skončym rolikam ad Gavarun.by — adnoj z najlepšych studyj, što ahučvajuć kino na rodnaj movie. Na svaim kanale «havaruny» publikujuć frahmienty ź sieryj i trejlery novych vypuskaŭ, biełaruskamoŭnyja koratkamietražki, a taksama roznyja cikavostki pa-biełarusku: epizody ź filmaŭ i pieśni z kino i multfilmaŭ.

Siem padkastaŭ pa-biełarusku dla tych, chto choča słuchać svajo

6 biełaruskamoŭnych jutub-kanałaŭ, jakija vy mahli prapuścić

Chočacie na rodnaj movie? Voś piać resursaŭ, dzie možna pahladzieć kino pa-biełarusku

• 47
• 0
• 1
• 2
• 1
• 3
• 16
• 0