Sabaki płačuć ad radaści, kali ich haspadary viartajucca dachaty
Machać chvastom i addana hladzieć u vočy — nie adziny sposab, jaki sabaki vykarystoŭvać, kab vić viaroŭki z haspadaroŭ. Jany taksama płačuć ad radaści, kali bačać haspadaroŭ paśla doŭhaha rasstańnia.
Viadoma, što sabaki vykazvajuć svaje emocyi i nastroj praz movu cieła ci z dapamohaj hołasu. Kantakt z haspadarom praz pozirk, ličać vučonyja, taksama dapamahaje kamunikacyi i ŭstalavańniu emacyjnaj suviazi. U sabak taksama jość muskuły la brovaŭ, što dajuć im mahčymaść rabić vočy vizualna bolš vialikimi, i heta nibyta prymušaje ludziej bolš kłapacicca pra sabaku, piša The Times.
Sabaki taksama ŭmiejuć płakać, ale ž vučonyja nikoli nie ličyli, što za hetaj ich rysaj moža chavacca niejkaja emacyjnaja patreba. Tym nie mienš, praca japonskich navukoŭcaŭ, što vyjšła ŭ časopisie Current Biology, raskryvaje sens sabačych śloz pa-novamu.
Daśledčyki vybrali 12 sabak-samak i 8 sabak-samcoŭ, žyvioły naležali da adnoj z troch parodaŭ: taksy, pudzieli ci łabradory. U pačatku ekśpierymientu sabaki zastavalisia doma z haspadarami. Navukoŭcy praviali ź imi test, jaki dazvoliŭ vyznačyć kolkaść śloznaj vadkaści, jakuju vypracoŭvali vočy kožnaj sabaki.
Potym žyvioł zabrali ad haspadaroŭ niedzie na 5-7 hadzin, a paśla hetaha viarnuli dachaty i znoŭ pamierali ŭ ich kolkaść śloznaj vadkaści. Vyśvietliłasia, što paśla uźjadnańnia z haspadarom kolkaść śloz u sabak značna pavysiłasia. Cikava, što sustrečy ź inšymi ludźmi na sabak tak nie ŭpłyvajuć, to-bok možna kazać pra ŭnikalnuju suviaź pamiž haspadarom i sabakam.
Ekśpierty papiaredžvajuć, što chacia ŭ sabak i pavialičvajecca kolkaść śloznaj vadkaści, ale ž jany ŭsio-taki nie pralivajuć ślozy ŭ zvyčajnym sensie. Tamu, kali vaš sabaka «płača» vielmi zaŭvažna, heta moža być prykmietaj razdražnieńnia voka, drapiny ci infiekcyi, i lepiej źviarnucca da vieterynara.
Kamientary