Šmat u kaho byli ŭ žyćci vypadki, kali prychodziłasia zadavolvacca małoj praciahłaściu snu. Ale jość tyja, chto adčuvaje siabie badziorym navat paśla 4-hadzinnaha adpačynku. Jak im heta ŭdajecca?
65-hadovy Bred Džonsan usio žyćcio spaŭ pa 4—6 hadzin za noč. U śviecie, dzie małuju kolkaść snu asacyjujuć ź miedyčnymi prablemami, Džonsan adčuvaŭ siabie nie takim, jak usie. Nie dapamahała navat toje, što Bred zaŭsiody mieŭ šmat enierhii i dasiahnuŭ dobrych karjernych vynikaŭ, dy jašče i stvaryŭ siamju z vaśmiu dziećmi.
Tolki ŭ 2005 hodzie Džonsan pačaŭ atrymlivać adkazy na svaje pytańni. Jon vyrašyŭ uziać udzieł u daśledavańni, što vyvučała ludziej, jakim całkam chapaje vielmi małoj praciahłaści snu. U mužčyny znajšli redkija hiennyja mutacyi, i mahčyma, mienavita jany adkaznyja za jaho asablivaść, piša Popular Mechanics.
Ad vašaha snu zaležyć toje, nakolki enierhičnym vy siabie adčuvajecie, a taksama vaša zdolnaść dumać, pamiatać, vučycca, ruchacca i šmat inšaha. Tym nie mienš, niama pramoj zaležnaści pamiž praciahłaściu snu i jaho jakaściu, i časam vysokaja jakaść snu dazvalaje źmienšyć jaho praciahłaść.
Jość niekalki rečaŭ, jakija, zhodna z navukoŭcami, abjadnoŭvajuć usich tych, kamu treba mała snu. Hetyja ludzi nie śpiać na praciahu 18-20 hadzin i pry hetym viaduć siabie našmat aktyŭniej, čym inšyja. U takich ludziej moža być dźvie pracy ci praca, vučoba dy jašče i chobi.
Taksama tyja, chto mała śpić, mienš chvarejuć. Jany taksama sutykajucca z dyjabietam, sardečnymi i inšymi chvarobami, ale ž heta apanoŭvaje ich u našmat starejšym uzroście, čym nas z vami. U dadatak, jany lepiej spraŭlajucca sa stresam, adroźnivajucca aptymizmam, majuć lepšuju pamiać, dobra pieranosiać bol i navat nie pakutujuć padčas padarožžaŭ praź źbityja bijarytmy.
U čym sakret karotkaha snu
Padčas snu naša cieła vyvodzić taksiny i adkidy i robić šmat inšych karysnych rečaŭ dla našaha zdaroŭja. Zvyčajna dla hetaha arhanizmu treba kala vaśmi hadzin, dyk čamu ž niekatoryja dajuć rady za čatyry?
Adkazam na hetaje pytańnie moža stać hiennaja mutacyja, jakuju vyjavili kitajskija navukoŭcy. Ludzi z takoj mutacyjaj, što paŭdzielničali ŭ daśledavańni, išli spać u zvyčajny čas, ale pračynalisia vielmi rana.
Kitajcy taksama vyvučyli mozh myšej, jakija majuć tuju ž hiennuju mutacyju, jak i ludzi, što mała śpiać. Ekśpierty znajšli niekatoryja ahulnyja rečy ŭ funkcyjanavańni mozha takich myšej, ale ž patrebna šmat daśledavańniaŭ, jakija patłumačyli b, jak hieny rehulujuć pracu mozha. Tym nie mienš, atrymanyja danyja ŭžo pakazvajuć: dla niekatorych ludziej nasamreč mahčyma spać vielmi mała i pry hetym zastavacca zdarovymi.
Takich ludziej zvyčajna abjadnoŭvaje vysokaja talerantnaść da bolu, i Bred Džonsan adčuvaje heta na sabie. Mužčynu treba zamianiać sustavy ŭ abodvuch kaleniach, ale ž jon adkładaje praceduru, bo amal nie adčuvaje bolu ŭ sustavach, čym šakuje daktaroŭ.
Džonsan usprymaje svaju zdolnaść mała spać jak dar, bo dziakujučy hetamu jon maje šmat volnaha času, jaki inšyja ludzi traciać na son. Heta, u svaju čarhu, dapamahaje jamu dasiahać pośpiechaŭ u karjery i dapamahać inšym.
Navukoŭcy pakul nie viedajuć, jak uźnikła takaja karysnaja dla mužčyny hiennaja mutacyja. Vyvučeńnie taho, jak śpiać hetyja ludzi, mahło b prynieści šmat karysnaha navucy i navat dapamahčy inšym u budučyni taksama tracić mienš času na son.
Čytajcie taksama:
U jakoj pozie my śpim? Heta maje vializnaje značeńnie
Jak zmahacca z chrapam? Piać sposabaŭ
Ciapier čytajuć
Polski dypłamat raskazaŭ, jak pryvoziŭ Kolu multfilmy na dyskach i kim dla siamji Łukašenkaŭ byŭ Makiej8
Kamientary