Maci Saakašvili zaklikała Uładzimira Zialenskaha dapamahčy jaje synu
Maci eks-prezidenta Hruzii Michaiła Saakašvili Hijuli Ałasanija źviarnułasia da ŭkrainskaha prezidenta Uładzimira Zialenskaha z prośbaj dapamahčy jaje synu, jaki ad 1 kastryčnika znachodzicca ŭ hruzinskaj turmie.
Pra heta jana zajaviła ŭ videazvarocie, apublikavanym na staroncy Saakašvili ŭ fejsbuku, piša RBK.
«Ja chaču źviarnucca da spadara Zialenskaha, jaki nie raz i raniej nam dapamahaŭ. Ale ciapier nam asabliva patrebna jaho padtrymka i jaho dapamoha. Treba niejkim čynam arhanizavać pierapraŭku Michaiła siudy, va Ukrainu, kab tut jon zmoh atrymać adpaviednaje lačeńnie, adpaviedny kłopat i zmoh niejak vyžyć», — skazała jana.
Pavodle jaje słoŭ, Saakašvili znachodzicca na haładoŭcy ŭžo 35 dzion, i ź im «moža zdarycca ŭsio što zaŭhodna». Jana taksama skazała, što ŭ turemnym špitali niama adpaviednych śpiecyjalistaŭ i naležnych umoŭ. «Ja vielmi na vas spadziajusia. Na ŭsich vas — ludziej va Ukrainie», — zaklučyła maci eks-prezidenta.
***
Saakašvili 1 kastryčnika viarnuŭsia ŭ Hruziju pierad praviadzieńniem u krainie miascovych vybaraŭ. U toj ža dzień premjer-ministr Iraklij Harybašvili zajaviŭ, što Saakašvili zatrymany i znachodzicca ŭ turmie. U dačynieńni da jaho zaviali spravu ab niezakonnym pierasiačeńni dziaržaŭnaj miažy. Jamu pahražaje da šaści hadoŭ turmy
Advakat Saakašvili Pieka Basiłaja nazyvaŭ prezidenckaje pamiłavańnie adzinym šancam paźbiehnuć pakarańnia. Adnak prezident krainy Sałome Zurabiešvili admoviłasia heta zrabić.
«Adkaz adzin, prosty i kančatkovy: nie i nikoli», — padkreśliła jana.
Ciapier čytajuć
Fiaduta rezka adkazaŭ Kaleśnikavaj: Za što vy zmahalisia ŭ 2020 hodzie, nie cikavić nikoha, akramia miadźviedziaŭ ź bierlinskaha zaaparka, jakija vas atačajuć4949
Kamientary