Preparat, zrobleny z dapamohaj łamy, pakazaŭ dobryja vyniki na pačatkovych ispytach.
Hrupa navukoŭcaŭ pad kiraŭnictvam brytanskaha Instytuta Razalindy Franklin śćviardžaje, što vyrableny z dapamohaj łam preparat maje patencyjał dapamahać ad kavidu.
Asnoŭny kampanient novaj terapii — nanacieły, to-bok maleńkija i bolš prostyja viersii antyciełaŭ, jakija arhanizmy łam i viarbludaŭ vyrablajuć u adkaz na infiekcyju. Kali preparat projdzie teściravańnie na ludziach, jaho možna budzie vykarystoŭvać u formie zvyčajnaha nazalnaha spreju. Leki ad łam patencyjna mohuć nie tolki lačyć kavid, ale i praduchilać zachvorvańnie, kali zaražeńnie zdaryłasia nie tak daŭno, piša VVS.
Pakul što dziejańnie preparata pravieryli na hryzunach. Žyvioły, inficyravanyja virusam kavidu, całkam ačuniali za šeść dzion.
Słužba hramadskaj achovy zdaroŭja Anhlii ŭžo nazyvaje novy sprej adnym z samych efiektyŭnych niejtralizataraŭ virusa kavidu, jaki byŭ prateściravany ŭ hetaj struktury.
Kab atrymać tyja samyja nanacieły, daśledčyki źviarnulisia pa dapamohu da łamy Fifi, što žyvie na fiermie ŭ brytanskim univiersitecie Rydynha. Žyviole ŭviali maleńkuju i niezaraznuju čaścinku virusnaha białka, što prymusiła jaje imunnuju sistemu vyrabić śpiecyjalnyja malekuły. Paśla hetaha navukoŭcy vybrali z kryvi łamy patencyjna samyja efiektyŭnyja nanacieły, jakija padychodzili da struktury virusnaha białka nibyta kluč da zamka. Narešcie, daśledčyki razmnožyli hetyja nanacieły ŭ łabaratornych umovach.
Ale ž čamu nanacieły takija efiektyŭnyja? Jak i našy ŭłasnyja antycieły, nanacieły ad łam prymacoŭvajucca da virusaŭ i bakteryj, što traplajuć u cieła čałavieka, i «paznačajuć» ich dla astatnich elemientaŭ imunnaj sistemy. Takaja paznaka dapamahaje imuncy zrazumieć, jakija škodnyja ahienty pavinny być źniščanyja. Što da novych nanacieł, jany prymacoŭvajucca da virusa kavidu asabliva mocna.
Čytajcie taksama: 5 krain, što padčas pandemii viartajucca da zvyčajnaha žyćcia i spraŭlajucca lepiej za Biełaruś
Ciapier čytajuć
«U majho 21 santymietr — dziesiać bazavych dali». Biełarusy ŭ tyktoku žartujuć z novych praviłaŭ ad čynoŭnikaŭ7
Kamientary