U Miensku adbylisia dva kamunistyčnyja źjezdy

U Miensku adbylisia dva kamunistyčnyja źjezdy Aleś Daščynski, Miensk Siońnia ŭ Miensku adbylisia dva źjezdy kamunistyčnych partyj – abjadnaŭčy źjezd aficyjnaj PKB i niečarhovy źjezd apazycyjnaj PKB. Na abodvuch źjezdach pabyvaŭ naš karespandent.

Tak zvany abjadnaŭčy źjezd KPB-PKB prachodziŭ u mienskim Domie aficeraŭ. Na jaho sabralisia kala 260 delehataŭ, a taksama kala 200 vieteranaŭ KPB, KPSS, pradstaŭniki kampartyjaŭ Rasiei, Ukrainy, Kitaja, Vijetnama i Tadžykistana. Prysutničaŭ taksama ambasadar Turkmenistanu. Siarod udzielnikaŭ źjezdu były staršynia Viarchoŭnaha savietu BSSR Mikałaj Dziemianciej, kolišni partyjny lider Jafrem Sakałoŭ dy inšyja. La doma aficeraŭ ciaham pracy źjezdu dziažuryła mašyna chutkaj dapamohi.

Asnoŭnym było ŭźjadnańnie KPB i PKB u adzinuju partyju na platformie aficyjnaj kampartyi. Havoryć delehat źjezdu, były nastaŭnik, 78-hadovy Anatol Kaśjanaŭ z Voršy:

(Kaśjanaŭ: ) “Taja palityka, jakuju stali pravodzić Kalakin i inšyja, nie adpaviadaje kamunistyčnaj idealohii. Heta suviaź z destruktyŭnymi, apazycyjnymi siłami”.

(Karespandent: ) “A navošta hetaje abjadnańnie, hety abjadnaŭčy źjezd?”

(Kaśjanaŭ: ) “Kab padtrymać urad, kiraŭnictva, i procistajać napłyvu zvonku, jaki zaraz starajucca zrabić imperyjalistyčnyja siły”.

Za pracaj alternatyŭnaha źjezdu ŭ zali “Biełkaapsajuzu”, na jaki pryjechali 66 delehataŭ, nazirali supracoŭniki specsłužbaŭ. Źjezd PKB nazvaŭ abjadnaŭčy źjezd sprobaj stvaryć partyju ŭłady z nastupnaj likvidacyjaj apazycyjnych palityčnych partyj. Na abjadnaŭčy źjezd byli pasłanyja siabry revizijnaj kamisii, kab pravieści rehistracyju siabraŭ PKB. Tłumačyć Viktar Chomič z Homielu:

(Chomič: ) “Nivodnaha siabra PKB na hetym źjeździe niama. Što za ludzi jaho pradstaŭlajuć – ciažka skazać, bo navat śpisaŭ hetych nie pakazali. Heta mierapryjemstva vielmi nahadvaje niešta z dalokich, ciomnych časoŭ našaj historyi, pra jakija mnie ciažka i navat brydka kazać”.

Staršynia PKB Siarhiej Kalakin zajaviŭ:

(Kalakin: ) “Heta nijaki nie abjadnaŭčy źjezd. Heta mierapryjemstva, sens jakoha nie razumiejuć navat sami kiraŭniki KPB. Heta cisk na našu partyju. Likvidacyja nas jak palityčnaj siły – heta adna z metaŭ hetaha palityčnaha mierapryjemstva. Adnak hetaje mierapryjemstva ni da čaho nie pryviadzie”.

Źjezd PKB pryniaŭ rezalucyju, u jakoj rašuča asudziŭ žorstkaść, biezzakońnie i samavolstva adnosna Alaksandra Kazulina. Delehaty vykazali svaju salidarnaść z palitviaźniem i zapatrabavali jahonaha nieadkładnaha vyzvaleńnia. Jany zaklikali ŭstupić u baraćbu za svabodu spadara Kazulina i inšych palitźniavolenych.

Radyjo Svaboda

• 0
• 0
• 0
• 0
• 0
• 0
• 0
• 0