U centry Dziaržynska na aŭkcyjon vystavili viadomy handlovy abjekt — «Dom handlu», jaki źjaŭlajeca starejšym univiermaham horada, piša domovita.by.
Budynak płoščaj amal 10 tysiač kvadratnych mietraŭ acanili ŭ 13,44 miljona rubloŭ (prykładna 4,76 miljona dalaraŭ). Razam ź im pakupnik atrymaje dolu ziamielnaha ŭčastka płoščaj bolš za 1 hiektar i ŭžo dziejny biznes z 27 arandatarami.
Sam abjekt — trochpaviarchovy budynak z padvałam, pabudavany jašče ŭ saviecki čas. Jaho budaŭnictva pačałosia ŭ 1970-ja, a adkryćcio adbyłosia ŭ 1988 hodzie. U 2021 hodzie praviali rekanstrukcyju: abnavili fasady, vokny, inžyniernyja sietki i ŭnutranyja pamiaškańni, tamu budynak ciapier prydatny da ekspłuatacyi biez dadatkovaha ramontu.
Siońnia ŭnutry pracujuć kramy, banki, servisnyja punkty i inšyja arendatary. Abjekt faktyčna zastajecca važnym handlovym centram horada.
Kab udzielničać u aŭkcyjonie, treba ŭnieści zadatak kala 10% ad koštu. Zajaŭki prymajucca da 21 maja 2026 hoda, a sami tarhi adbuducca na nastupny dzień, 22 maja. Pieramožca pavinien chutka padpisać damovu i raźličycca za abjekt, ale budynak ciapier maje bankaŭski ciažar, jaki budzie ŭrehulavany ŭ pracesie ździełki.
Kamientary