Što moža adbycca na pratestanckim «Fiestyvali nadziei», na jaki pryjedzie prapaviednik z ZŠA
Na vychodnych, 16—17 maja, u Minsku na «Čyžoŭka-Arenie» projdzie «Fiestyval nadziei», u jakim prymuć udzieł pratestanckija cerkvy. Padzieju takoha maštabu biełaruskim pratestantam dazvolili ŭpieršyniu za dziesiacihodździ. Fiestyval moža sabrać da dziesiaci tysiač čałaviek.
Na «Fiestyval nadziei» ŭ Minsk jedzie prapaviednik sa ZŠA Frenklin Hrem — adzin z samych viadomych jevanhielskich lidaraŭ u śviecie. Jon ładzić šmattysiačnyja pratestanckija fiestyvali ŭ Afrycy, Azii, Jeŭropie, spałučaje ich z maštabnymi humanitarnymi prajektami. Hrem vystupaŭ z malitvaj na inaŭhuracyi prezidenta ZŠA Donalda Trampa. Jon taksama siabruje ź siamjoj Džona Koŭła, śpiecyjalnaha pasłańnika prezidenta ZŠA ŭ Biełarusi, nahadvaje Radyjo Svaboda.
Padrabiaznaj prahramy «Fiestyvalu nadziei» ŭ adkrytym dostupie niama. Anansujuć chor z 1300 čałaviek, simfaničny arkiestr, suśvietnych i biełaruskich vykanaŭcaŭ, «pasłańnie pra luboŭ i mir ad Frenklina Hrema, asabistuju malitvu i padtrymku kožnaha».
U padrychtoŭcy «Fiestyvalu nadziei», sa słoŭ baptysckaha viernika Andreja (imia źmienienaje dziela biaśpieki surazmoŭcy), biaruć udzieł amal usie pratestanckija cerkvy Biełarusi, ale pieradusim baptysty i piacidziasiatniki.
«Chor, jaki ciapier rekłamujuć, — heta chor z roznych cerkvaŭ Biełarusi. Ja nie pamiataju, kab raniej taki chor źbiraŭsia. Jany trenirujucca ŭ piacidziasiatnickaj carkvie ŭ Minsku. Možacie ŭjavić, kolki patracili srodkaŭ, kab sabrać ludziej, pryvieźci z roznych kancoŭ Biełarusi, kab jany mahli parepietavać jašče da fiestyvalu», — raskazaŭ Andrej dla Radyjo Svaboda.
Jon tłumačyć, što zvyčajna na takich fiestyvalach jość dźvie častki: muzyčnaja — sa śpievami duchoŭnych himnaŭ i malitvaj, i kazańnie, jakoje havoryć hałoŭny śpikier. Praciahvajucca jany pa niekalki hadzin.
«Mahčyma, buduć karotkija śviedčańni ludziej, jakija raskažuć, čamu jany chryścijanie», — dadaje surazmoŭca.
«Centralnaj častkaj budzie propaviedź ad Frenklina Hrema. Jon budzie prapaviedavać ź pierakładam. Vidać, chvilin 30—40. U kancy propaviedzi budzie zaklik, kab ludzi spaviadalisia ŭ svaich hrachach, daviarali svajo žyćcio Chrystu», — razvažaje Hleb pra toje, jak moža vyhladać fiestyval.
Uvachod na fest biaspłatny. Chto finansuje padzieju, nieviadoma. Na dumku Andreja, sponsaram moža być Asacyjacyja Bili Hrema, jak heta byvała raniej.
«Čyžoŭka-Arena» źmiaščaje kala 10 tysiač čałaviek. Vierniki miarkujuć, što jana budzie poŭnaj. Patencyjna zapoŭnić placoŭku mohuć tolki pratestanty Minska. Ale zaprašajuć na fiestyval nie tolki pratestanckich viernikaŭ, a ŭsich žadajučych.
«Mahčyma, ułady tudy praviaduć i supracoŭnikaŭ siłavych struktur, i čynoŭnikaŭ z rajvykankamaŭ — što ž, niachaj pasłuchajuć pra Boha, niachaj dumajuć, jak im kajacca», — razvažaje Pavieł Sieviaryniec.
Surazmoŭcy «Svabody» nie ŭspaminajuć, kab raniej u Biełarusi prachodziła takaja bujnaja padzieja dla pratestantaŭ.
Adnak inšyja vialikija imprezy ŭsio ž adbyvalisia, jany časam źbirali tysiačy čałaviek. «Byvała, što ŭ haradach stavili vializny namiot — nie treba było zdymać pamiaškańnie — pravodzili jevanhielizacyju, zaprašali ludziej pahavaryć pra Boha, pra sens žyćcia. Takija padziei rehularna pravodzili. Pamiataju, na Kanhres moładzi pad Kobrynam u 2010 hodzie sabralisia bolš za tysiaču čałaviek», — uspaminaje Andrej.
U Breście haradskoje śviata «Horad śviatła» ładzili mienavita pratestanty, raskazvaje Hleb. Tudy prychodzili nie tolki vierniki, ale i ŭsie žychary horada. Na scenie vystupali i «krutyja muzykanty»i chryścijanskija prapaviedniki.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?77
Kamientary
kazańni, pa-mojmu ž pramaŭlajuć (?)