Jak majstar-samavučka z Baranavičaŭ z dapamohaj małatka stvaraje karciny na škle
Raman Bondar — mastak z Baranavičaŭ, jaki z dapamohaj małatka stvaraje niezvyčajnyja karciny sa škła. Treščyny pasłuchmiana składvajucca va ŭzory i tvary viadomych ludziej. Biełta daviedałasia ŭ «kryštalnaha majstra», jak jamu pakaryłasia technika, u jakoj pracuje ŭsiaho kala dziasiatka čałaviek u śviecie.
Tvorčaja historyja Ramana pačałasia z DTZ. U momant avaryi halinka ŭpała na łabavoje škło, i na dolu siekundy jon ubačyŭ u treščynach niejki vobraz.
Raman pryznajecca, što nie vieryć u znaki losu, ale pahadžajecca: nie było b ščaścia, dy niaščaście dapamahło. Kab nie toje DTZ, jon by nie adkryŭ u sabie talent i nie staŭ by pakazvać biełarusam zusim novaje sučasnaje mastactva. Darečy, majstroŭ, jakija zajmajucca bitym škłom, u śviecie možna pieraličyć pa palcach. U Biełarusi Raman — adziny.
Jak jon navučyŭsia hetaj technicy? Nichto ŭ śviecie svaim majsterstvam nie dzielicca i kursaŭ nie pravodzić.
Raman prosta braŭ u ruki małatok, kłaŭ pierad saboj škło i pačynaŭ bić pa im. Paśla dvuch hadoŭ trenirovak z treščyn źjaviŭsia pieršy partret.
«U luboj spravie važnaja nahledžanaść: kali ŭvažliva ŭhladacca ŭ detali i sprabavać ich prajhrać, možna dabicca vyniku, — upeŭnieny jon. — Hałoŭnaje — nie pačynać z dumki pra hrošy. Kali tvorčaść idzie ad unutranaha paryvu, jana atrymlivajecca sapraŭdnaj».
Eskiz dla budučaj karciny jon nikoli nie robić, tolki paznačaje niekatoryja zony — dzie buduć nos, vočy. Majstar stvaraje svaje tvory na šmatsłojnym škle čornaha koleru (trypleksie), bo zvyčajnaje ad udaru rassypajecca na drobnyja askołki.
Pavodle jaho słoŭ, možna tolki prykładna ŭjavić, jak raskolina pojdzie dalej. A potym škło jak byccam samo «kaža», što rabić.
Raman pastupova sychodzić ad partretaŭ da stvareńnia malunkaŭ na škle vitryn kram, sałonaŭ, restaranaŭ. I maje svaju maru.
«Kalehi ź inšych krain robiać vitryny maksimum na 5—10 mietraŭ. A ja chaču niešta hrandyjoznaje: instalacyju daŭžynioj 50 mietraŭ! — dzielicca maraj Raman Bondar. — Heta moža być tvar, łahatyp abo niejki simvaličny vobraz, jaki adlustroŭvaje sutnaść budynka abo krainy».
Ciapier čytajuć
Łukašenka zajaviŭ pra hatoŭnaść pryjechać u Kijeŭ54
Kamientary