«Kacia! My tut!»: pačaŭsia sud nad žurnalistkaj Kaciarynaj Barysievič i doktaram Arciomam Sarokinym. Praces zakryli
Doktara BCHMD Arcioma Sarokina i žurnalistku Tut.by Kaciarynu Barysievič zatrymali roŭna try miesiacy tamu — 19 listapada. Na dumku Hienprakuratury, jany vydali miedycynskuju tajamnicu ab stanie Ramana Bandarenki, što paciahnuła ciažkija nastupstvy, a mienavita «pavyšeńnie napružanaści ŭ hramadstvie i stvareńnie atmaśfiery niedavieru da kampietentnych dziaržaŭnych orhanaŭ». Siońnia ich spravu razhladaje sud Maskoŭskaha rajona Minska. Arciomu i Kaciarynie pahražaje da troch hadoŭ pazbaŭleńnia voli.
10:40
U vyniku praces zakryli. Usich vypravadzili z zały. Pakinuli tolki advakataŭ.
«Kab paźbiehnuć vydavańnia miedycynskaj tajamnicy i danych papiaredniaha rasśledavańnia. Materyjały spravy ŭtrymlivajuć miedycynskija dakumienty, jakija ŭ tym liku raniej nie publikavalisia».
Tut.by
10.27
Prakuror chadajničaje ab słuchańni ŭ zakrytym pasiadžeńni, abarona kateharyčna nie zhodnaja: majecca zajava maci Ramana, jana nastojvaje na adkrytaści pasiadžeńnia. Advakat Kaciaryny Barysievič kaža: «Maci Bandarenki źjaŭlajecca adzinym čałaviekam, jaki moža dać ci nie dać zhodu na toje, kab sud byŭ adkrytym».
«Ja chaču, kab hramadstva viedała, za što sudziać žurnalista i lekara, tamu padtrymlivaju chadajnictva advakata», — kaža Kaciaryna Barysievič.
Doktar Arciom Sarokin taksama za adkryty praces.
Rašeńnie ab tym, zakryvać sud abo nie, budzie abvieščana ŭ 10.40.
10:25
Pasiadžeńnie pa spravie Barysievič i Sarokina startavała. U zału trapili advakaty, svajaki abvinavačanych, a taksama niekalki kaleh. Kala zały suda praciahvajuć stajać ludzi. Ciapier ich kala 100 čałaviek. Taksama ŭ zału sprabuje trapić advakat Aleny Bandarenka, maci zahinułaha Ramana. Jaje nie puskajuć.
***
Praces prachodzić u Domie pravasudździa (vuł. Siamaški, 33a). Sudździa — Śviatłana Bandarenka, namieśnik staršyni suda Maskoŭskaha rajona pa kryminalnych spravach. Kaciarynu Barysievič abaraniajuć advakaty Andrej Mačałaŭ i Michaił Badnarčuk, Arcioma Sarokina — Volha Baciuk.
Barysievič i Sarokina zaviali praz asobny ŭvachod. «Kacia! My tut», — stali kryčać prysutnyja i apładziravać.
Pad dźviaryma zały sabralisia niekalki dziasiatkaŭ čałaviek, bolšaść nie prapuścili ŭ zału. Admoŭlena ŭ akredytacyi i žurnalistam niezaležnych ŚMI.
Na sud pryjšła mama Ramana Bandarenki. «Viadoma, ja raźličvaju trapić na sudovaje pasiadžeńnie, tamu ja tut. Ja liču, Kaciaryna i doktar Sarokin ničoha nie parušyli, dazvoł byŭ mnoju dadzieny. Jak čałaviek aptymistyčny, ja spadziajusia, što spraviadlivaść pieramoža. Choć, jak pakazvaje sudovaja praktyka, i navat apošnich dzion, spraviadlivaści niama», — skazała jana.
Kamientary