Strajkoŭcaŭ Novaha teatra prymusili zapłacić pa 5 rubloŭ i zvolnicca

27 kastryčnika piatnaccać čałaviek, siarod jakich akciory i techničnyja rabotniki teatra, paviedamili administracyi ab dałučeńni da Ahulnanacyjanalnaha strajku, što vyklikała hučny kanflikt z abrazami i rukaprykładstvam z boku dyrektara Vasila Marcieckaha. Strajkoŭcy vysunuli nie tolki palityčnyja patrabavańni, jany taksama byli zakłapočany tym, što teatr ihnaruje miery pieraściarohi padčas pandemii.

«Ni zahad Minharvykankama, ni ŭnutranaje rasparadžeńnie dyrektara, jakija tyčylisia epidemijałahičnaj situacyi, nie vykonvalisia, — kaža były ŭžo mastak pa śviatle Novaha dramatyčnaha teatra Daniła Hančaroŭ. — 24 kastryčnika ŭ nas prajšoŭ śpiektakl pry poŭnym anšłahu. Navat u materyjałach, dałučanych da sudovaj spravy, iściec pryznaŭ, što nie kiravaŭsia zahadami pry prodažy kvitkoŭ. A być supolnikam u raspaŭsiudžvańni karanavirusnaj infiekcyi asabista mnie niepryjemna».

Z taho dnia razmoŭ pamiž administracyjaj i kalektyvam bolš nie było — zamiest dyjałohu teatr padaŭ na piatnaccać svaich supracoŭnikaŭ u sud z namieram pryznać ich zabastoŭku niezakonnaj, što patencyjna daje mahčymaść zvolnić ludziej pavodle artykuła.

U materyjałach, dałučanych da spravy, byŭ i raźlik, pavodle jakoha praz zabastoŭku i admienienyja śpiektakli teatr niedaatrymaŭ 15 tysiač rubloŭ. Praŭda, raźlik byŭ zrobleny biez uliku šachmatnaj rassadki hledačoŭ u zale, dy i patrabavańnia spahnać hetyja hrošy sa strajkoŭcaŭ nie było.

Akcioram daviadziecca tolki kampiensavać dziaržaŭnuju pošlinu — a heta pryblizna pa 5 rubloŭ z kožnaha.

Sud u vyniku zadavoliŭ isk, a heta značyć, što piatnaccać čałaviek nie vykonvali svaje pracoŭnyja abaviazki amal miesiac. Pa viartańni na pracoŭnyja miescy paśla suda supracoŭnikam admovilisia vydać klučy ad hrymiorak i śvietłavoha cecha.

«Pravavych padstaŭ dla hetaha nie było. Patłumačyć, čamu było pryniata takoje rašeńnie, nam nie zdoleli, ale skazali, što addaduć klučy paśla taho, jak my napišam tłumačalnyja zapiski, — kaža Daniła Hančaroŭ.

Razam z tłumačalnymi zapiskami amal usie, aproč dvuch čałaviek, adnieśli zajavy na zvalnieńnie. Zrešty, na nastupny dzień, to-bok siońnia, paśla nastojlivych prapanoŭ administracyi zajavy napisali i tyja dva čałavieki.

«Nas by ŭ lubym vypadku zvolnili pavodle artykuła. Paśla taho, jak my abviaścili zabastoŭku i dyrektar nakinuŭsia na akciora Andreja Bibikava i abraziŭ inšych, jon bolš z nami nie razmaŭlaŭ. Heta paćviardžaje, što nijakich sprobaŭ urehulavać situacyju kiraŭnictva nie prymała. Siońnia ja asabista byŭ ŭ kabiniecie dyrektara pa spravach — jon nie zakranaŭ hetuju temu. A hałoŭny režysior Siarhiej Kulikoŭski spačatku trymaŭsia niejtralnaj pazicyi, ale, vidać, paśla razmovy z dyrekcyjaj zaniaŭ jaje bok. Viedaju, što jon dasyłaŭ akcioram sms nie samaha pryjemnaha źmiestu: kazaŭ, što jany ničoha nie vartyja i jamu ŭ teatry niepatrebnyja. Moža być, heta z-za taho, što jon pieražyvaje straty».

U trupie Novaha dramatyčnaha teatra, pavodle Daniły Hančarova, zastałosia trynaccać čałaviek.

• 0
• 0
• 0
• 0
• 0
• 0
• 0
• 0