Tak musili vyhladać ahitacyjnyja biłbordy Śviatłany Cichanoŭskaj
Dziaržaŭnyja pradpryjemstvy i pryvatnyja kampanii, jakija zajmajucca raźmiaščeńniem vonkavaj reklamy, admovili kandydatcy ŭ prezydenty Biełarusi Śviatłanie Cichanoŭskaj u raźmiaščeńni ahitacyjnych biłbordaŭ, piša «Radyjo Svaboda».
30 lipienia Cichanoŭskaja padpisała damovu ź dziaržaŭnaj arhanizacyjaj «Homielabłreklama» na raźmiaščeńnie reklamnych plakataŭ na 7 biłbordach pa Homielskaj vobłaści. Heta była adzinaja kampanija, jakaja «ŭ pryncypie pahadziłasia zrabić nam takuju pasłuhu», adznačajuć u pres-słužbie kandydatki.
Adnak užo na nastupny dzień dyrektar kampanii patelefanavaŭ i paprasiŭ prabačeńnia, što nia moža vykanać damovu, bo Homielski abłvykankam zabaraniŭ heta rabić, matyvujučy tym, što jamu terminova spatrebiłasia raźmiaścić 7 plakataŭ sacyjalnaj reklamy.
Presavaja sakratarka Homielskaha abłvykankamu Volha Rabikava paabiacała «Svabodzie» razabracca ŭ hetym pytańni i dać kamentar pa abiedzie 31 lipienia.
Pradstaŭnik Homielskaha harvykankamu, adkazny za idealohiju, Mikałaj Śviatahor taksama admoviŭsia prakametavać vypadak, spasłaŭšysia na niaviedańnie detalaŭ.
Jak paviedamlaje pres-słužba Cichanoŭskaj, dziaržaŭnaje pradpryjemstva «Mienskreklama» admoviłasia razhladać mahčymaść raźmiaščeńnia plakataŭ, spasyłajučysia na toje, što sacyjalnaja reklama važniejšaja za vybary.
U štabie Cichanoŭskaj źviartalisia taksama ŭ pryvatnyja kampanii ŭ Bieraści, Horadni, Miensku i Homli. Paŭsiul im admaŭlajuć, paviedamlaje pres-słužba kandydatki.
Zhodna ź dziejnym zakanadaŭstvam kandydat nie abaviazany ŭzhadniać ahitacyjnyja materyjały. Pieraškody z boku orhanaŭ vykanaŭčaj ułady — heta najhrubiejšaje parušeńnie vybarčaha zakanadaŭstva i pravoŭ hramadzian na atrymańnie infarmacyi pra kandydata, adznačajuć u štabie kandydatki.
Ciapier čytajuć
Stancyju mietro na praśpiekcie Pieramožcaŭ pieradumali budavać?3
Kamientary