«U fondzie ciapier € 1,2 młn». U APK adkazali na krytyku nakont braku hrošaj dla palitviaźniaŭ
Dniami Volha Zazulinskaja z Abjadnanaha pierachodnaha kabinietu zaklikała biełarusaŭ rychtavać hrošy dla 1300 palitviaźniaŭ, jakich mohuć u adzin momant vyzvalić i vyvieźci ź Biełarusi. Za heta šmat chto raskrytykavaŭ «ministarku» i pytaŭsia: dzie hrošy i čamu demakratyčnyja siły nie hatovyja da padtrymańnia represavanych? Zazulinskaja adkazała na zakidy ŭ kamientary «Biełsatu».
«U nas jość Mižnarodny humanitarny fond, ale srodkaŭ u im moža akazacca niedastatkova dla takoj maštabnaj dapamohi», — papiaredziła 15 žniŭnia pradstaŭnica Abjadnanaha pierachodnaha kabinietu ŭ sacyjalnaj palitycy Volha Zazulinskaja.
Hutakrka pra 1300 palitviaźniaŭ, vyzvaleńnie jakich Donałd Tramp abmiarkoŭvaŭ u toj dzień z Alaksandram Łukašenkam. Napiaredadni prezident ZŠA znoŭ napisaŭ pra źniavolenych, vykazaŭšy spadzieŭ, što ludzi «chutka vyjduć na volu».
Zazulinskaja adznačała, što «pry lubym raźvićci padziej my pavinny być hatovyja pryniać lubuju kolkaść biełarusaŭ, navat kali heta budzie 1300 čałaviek adnačasova»:
«Zaklikajem biełarusaŭ za miažoj užo ciapier rychtavacca da takoha scenara i abjadnoŭvacca, kab sustreć hetych ludziej i padtrymać ich».
Hety zaklik aburyŭ častku kamientataraŭ u sacsietkach. Maŭlaŭ, donary vydatkavali dastatkova hrošaj, kudy srodki padzielisia? Ukrainski palitołah Jaŭhien Mahda dyk naahuł upeŭnieny, što Zazulinskuju za takija zajavy «patrebna hnać» z Kabinietu:
«Rassyłajcie dykpiki i fota hrudziej, pradavajcie hadzińniki Franaka i futbołki Łatuški, katlety Cichanoŭskaha i viačery ź Cichanoŭskaj, adspravazdačciesia pra atrymanyja raniej srodki, ale ludziej z-za krataŭ patrebna vyciahnuć».
U razmovie z «Biełsatam» Volha Zazulinskaja adznačyła, što «razumieje emocyi i čakańni»:
«Jany naturalnyja, bo havorka idzie pra dapamohu sotniam ludziej u składanaj situacyi. Maja zadača — pryciahvać uvahu da prablemy, danosić partnioram realnyja patreby i padkreślivać, što padtrymańnie nieabchodnaje. Važna, kab razam u hety praces uklučalisia dziaržavy, arhanizacyi i biełaruskaja supolnaść».
Dopis Mahdy jana rastłumačyła tym, što palitołah, padobna, «nie maje poŭnaj karciny pra toje, jak pracuje fond i raźmierkavańnie srodkaŭ»:
«Fond dapamohi represavanym farmujecca za košt unioskaŭ zamiežnych uradaŭ, i my ŭdziačnyja kožnamu za heta. Hetyja srodki praź biełaruskija arhanizacyi dapamohi dachodziać da ludziej. Jość i jeŭrapiejskija prahramy padtrymańnia. Ale, uličvajučy maštab represijaŭ, najaŭnych resursaŭ vidavočna niedastatkova».
Pavodle Zazulinskaj, ciapier u Mižnarodnym humanitarnym fondzie krychu bolš za €1,2 młn. Jaho napaŭnieńnie łabijuje Ofis Śviatłany Cichanoŭskaj i Pierachodny kabiniet, i dziaržavy-partniory samyja vyznačajuć, kolki hrošaj achviaravać. Apierataram fondu vystupaje Narviežski Chielsinkski kamitet, jaki raźmiarkoŭvaje finansavańnie pamiž arhanizacyjami:
«Heta nie struktura dla indyvidualnych zvarotaŭ. Finansavańnie atrymlivajuć pravaabarončyja i humanitarnyja arhanizacyi, jakija pracujuć sa svaimi hrupami: siemjami palitviaźniaŭ, vyzvalenymi, vymušanymi mihrantami. Tak minimizujucca administracyjnyja vydatki, a dapamoha idzie niepasredna tym, chto maje ŭ joj patrebu».
Kali najaŭnyja hrošy padzialić na 1300 asobaŭ, to kožnaja atrymaje mienš za €1000:
«Na siońnia arhanizacyjam užo pieraličana z fondu kala € 1,18 młn, jašče € 1,23 młn zastajucca na rachunku apieratara. Kali padzialić hetuju sumu na mahčymyja 1300 čałaviek, atrymajecca mienš za € 1000 na kožnaha. Heta vidavočna niedastatkova dla pakryćcia ŭsich patrebaŭ: ad reabilitacyi i razavych vypłataŭ da žylla, lehalizacyi i bazavaha padtrymańnia».
Mienavita praz toje, što hrošaj na ŭsich brakuje, Zazulinskaja davodzić, što biełarusy musiać «rychtavacca da samaarhanizacyi, padtrymlivać fondy i rabić achviaravańni, kab u momant vyzvaleńnia ludzi nie zastalisia sam-nasam sa svaimi prablemami»:
«My ŭdziačnyja kožnaj krainie, jakaja robić svoj uniosak, i praciahvajem šukać dadatkovaje padtrymańnie. Ale vielmi važna, kab da hetaj spravy dałučalisia i samyja biełarusy. Kožny ŭniosak, vialiki ci mały, maje značeńnie. Heta taksama vynik vialikaj pracy Śviatłany Cichanoŭskaj, jakaja pryciahvaje ŭvahu da Biełarusi, pierakonvaje ŭrady, i dziakujučy hetamu jany nakiroŭvajuć hrošy na dapamohu represavanym».
Zazulinskaja dadała, što nie sumniajecca ŭ salidarnaści biełarusaŭ:
«Moj zvarot byŭ pra toje, što ŭ vypadku masavaha vyzvaleńnia nahruzka budzie kałasalnaja, i dapamoha kožnaha biełarusa za miažoj budzie žyćciova nieabchodnaj. My ŭžo nie raz dakazvali svaju salidarnaść i, upeŭniena, zmožam zrabić heta znoŭ. Heta pytańnie našaj ahulnaj adkaznaści i padtrymańnia adno adnaho».
Pradstaŭnica APK taksama prakamientavała patrabavańni adspravazdačycca nakont ruchu hrošaj praź Mižnarodny humanitarny fond:
«Pytańnie finansavaj spravazdačnaści, biezumoŭna, važnaje. Adnak ja, jak pradstaŭnica APK i kiraŭnica fondu «Kraina dla žyćcia», nie ŭdzielničaju ŭ pracy samoha Mižnarodnaha humanitarnaha fondu i nie maju dačynieńnia da kiravańnia srodkami, što prachodziać praź jaho. U miežach fondu «Kraina dla žyćcia» hetym kirunkam zajmajecca inšy supracoŭnik, jaki kuryruje ŭzajemadziejańnie ź mižnarodnym fondam. Kali idziecca pra spravazdačnaść nakont pracy samoha Mižnarodnaha humanitarnaha fondu, varta źviartacca da apierataraŭ fondu. Kali ž pytańnie tyčycca kankretnaj arhanizacyi, to łahična źviartacca niepasredna ŭ hetuju arhanizacyju».
Ciapier čytajuć
Minčuk čatyry hady trymaŭ u rabstvie piensijanieraŭ i prymušaŭ ich prasić miłaścinu. Jany ŭžo pamierli8
Kamientary
"..Kak soobŝajetsia v litovskom cientrie riehistrov, v 2023 hodu dochod juridičieskoho lica, upravlajuŝieho Ofisom Tichanovskoj v Litvie, sostavił 122 929 jevro." A za piať let ........