Novy ahmień. U Ispanii za dzień ad karanavirusa pamierła 182 čałavieki
U Ispanii za dzień ad karanavirusa pamierła 182 čałavieki. Pra heta paviedamili sanitarnyja słužby krainy.
Ispanija pieratvaryłasia ŭ druhi paśla Italii ahmień epidemii ŭ Jeŭropie.
Ad paniadziełka ŭłady krainy ŭviali strohija abmiežavańni na aktyŭnaść i pierasoŭvańni ludziej. Zakrytyja škoły, univiersitety, kulturnyja i spartovyja ŭstanovy, a taksama bary i restarany. Da patrulavańnia vulic krainy dałučylisia Uzbrojenyja siły karaleŭstva.
Ahulnaja kolkaść vyjaŭlenych nośbitaŭ virusa ŭ Ispanii pieravysiła 11 tysiač. Varta adznačyć, što hetaja ličba niapoŭnaja, bo ŭ Madrydzie, na jaki prypadaje pałova zaražeńniaŭ, ludziej ź lohkimi simptomami pierastali teściravać praź pierahruzku łabaratornych mahutnaściej.
Biełaruś pa stanie na 16 sakavika zastavałasia na pieryfieryi pandemii karanavirusa. U krainie zafiksavana 36 vypadkaŭ zaražeńnia, 35 ź ich lohkija.
Tym nie mienš, u adpaviednaści z rekamiendacyjami Ministerstva achovy zdaroŭja ŭniviersitety Biełarusi pierajšli na bieźlekcyjnaje navučańnie.
Zaniatki praciahvajucca, ale pieravaha addajecca dystancyjnym mietadam, a taksama łabaratornym i sieminarnym zaniatkam, kab navučency nie źbiralisia vialikimi hrupami.
Akramia taho, niekatoryja fakultety źmianili raskład tak, kab studenty nie mianiali aŭdytoryj, a zastavalisia ŭ toj samaj aŭdytoryi.
Na karancin adpraŭlajuć tyja hrupy studentaŭ, u jakich jość infikavany. Takoje adbyłosia, naprykład, u Biełaruskim dziaržaŭnym univiersitecie. Nitački zaražeńnia ŭ Biełaruś iduć ź Irana, Italii, Niamieččyny i Rasii.
Virus u Biełarusi pakul amal nie začapiŭ ludziej starejšaha ŭzrostu, dla jakich jon ujaŭlaje najbolšuju niebiaśpieku.
Pa stanie na viečar 15 sakavika kolkaść vyjaŭlenych achviar karanavirusa ŭ śviecie pieravysiła 7100. Usiaho ŭ śviecie vyjaŭlena bolš za 183 tysiačy zaražeńniaŭ. Asabliva tryvožnaja situacyja składajecca ŭ Italii, Iranie, Ispanii.
Vysokaja kolkaść śmiarotnych vypadkaŭ praparcyjna da kolkaści vyjaŭlenych nośbitaŭ fiksujecca ŭ Indanezii, Francyi, ZŠA, Niderłandach i na Filipinach. Heta moža aznačać, što ŭ dadzienych krainach vyjaŭlenaja tolki małaja dola nośbitaŭ infiekcyi. Anałahičnaje adnosicca da Ispanii i Italii.
Pa kolkaści vyjaŭlenych zaražeńniaŭ na dušu nasielnictva ŭ čyrvonaj zonie taksama Šviejcaryja, Narviehija, Danija, Estonija, Słavienija, Šviecyja, Aŭstryja.
Možna čakać, što situacyja ŭ najbližejšyja dni budzie abvastracca. Pakul svajho piku ŭ Jeŭropie i ZŠA epidemija nie dasiahnuła.
Bolšaść jeŭrapiejskich krain uviali strohija karancinnyja miery, spynili zaniatki ŭ škołach i ŭniviersitetach i rychtujuć prahramy dapamohi kampanijam, jakija pacierpiać ad ekanamičnaha spadu ŭ vyniku pandemii.
Kamientary