Rasijskaje śpiecyjalizavanaje vydańnie pra naftu «Niefť-Kapitał» napisała materyjał, u jakim praanalizavała, jak na Biełaruś paŭpłyvaje rasijski naftavy padatkovy manieŭr. Vydańnie apytała niekalkich ekśpiertaŭ, i ich vysnovy dla Biełarusi niesuciašalnyja. «Niefť-Kapitał» piša, što biełaruskaja ekanomika vyčarpała ŭsie resursy dla rostu, rasijski padatkovy manieŭr istotna pahoršyć situacyju, i vyjście dla Biełarusi tolki adno — kapitulacyja pierad Rasijaj.
Rasijskaje śpiecyjalizavanaje vydańnie nahadała pra słovy Łukašenki pra «front», jakija jon pramoviŭ pierad ahraryjami ŭ Škłoŭskim rajonie. «Niefť-Kapitał» miarkuje, što adno z asnoŭnych pytańniaŭ, jakoje niepakoić Łukašenku, — skaračeńnie dachodaŭ ad biełaruskaj naftapierapracoŭčaj haliny.
Čytajcie taksama: Łukašenka prystrašyŭ čynoŭnikaŭ dałučeńniem da inšaj dziaržavy i vajnoj, «jak va Ukrainie»
Vydańnie miarkuje, što cana nafty dla Biełarusi moža istotna pavialičycca, što pahoršyć płaciežny bałans našaj krainy.
Čakajecca, što straty buduć takimi vialikimi, što ich nie ŭdasca kampiensavać ź isnujučych krynic valutnych pastupleńniaŭ.
Namieśnik dyrektara hrupy karparatyŭnych rejtynhaŭ Analityčnaha kredytnaha rejtynhavaha ahienctva Vasil Tanurkoŭ miarkuje, što najbolš imavierny scenar dla Biełarusi paśla zaviaršeńnia padatkovaha manieŭra — źnižeńnie paliŭnych akcyzaŭ.
«Što tyčycca vykarystańnia miechanizmaŭ JEAES, to tut haryzont mahčymych rašeńniaŭ vielmi addaleny. U pačatku 2018 hoda Rada Jeŭrazijskaj ekanamičnaj kamisii (JEEK) uchvaliła prajekt «Ab farmiravańni supolnych rynkaŭ nafty i naftapraduktaŭ JEAES» tolki z 2025 hoda, heta značyć istotna paźniej, čym mierkavanaje zaviaršeńnie padatkovaha manieŭra ŭ Rasii»,
— piša «Niefť-Kapitał».
Ekśpiert Vasil Kałtašoŭ ličyć, što ŭ Biełarusi jość tolki adziny šlach —
«u skład Rasii ŭ naturalnym vyhladzie, pakul zastajecca mahčymaść abjadnańnia biełaruskaha kapitalizmu z rasijskim na roŭnych umovach».
Dalejšaje raźvićcio padziej budzie zaležać ad taho, jak buduć uzajemadziejničać strukturnyja i piersanalnyja faktary. Z adnaho boku, adznačaje Kałtašoŭ, Łukašenka na praciahu mnohich hadoŭ zabiaśpiečvaŭ mahčymaści dla zachavańnia i raźvićcia biełaruskaj pramysłovaści i sielskaj haspadarki, ale na siońniašnim etapie dasiahnuty miežy ekanamičnych mahčymaściaŭ. Heta jašče niekalki hadoŭ tamu pakazaŭ kryzis, kali adbyłosia abiasceńvańnie nacyjanalnaj valuty Biełarusi, a ekanomiku krainy achapiła panika. U budučyni mahčymy paŭtor takoha kryzisu, pryčym u jašče bolš žorstkim varyjancie, i ŭ hetaj situacyi pytańnie pra intehracyju Biełarusi stanovicca ŭsio bolš aktualnym, śćviardžaje ekśpiert. Ale ŭsio ŭpirajecca ŭ asobu Łukašenki, jaki razhladaje heta jak scenar anieksii. Choć, miarkuje Kałtašoŭ, kali b jon abviaściŭ kurs na ŭźjadnańnie Biełarusi z Rasijaj, to zaniaŭ by vielmi vysokaje stanovišča ŭ novaj sistemie.
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja22
Kamientary