Aranžavy ŭzrovień niebiaśpieki z-za mocnaha vietru abvieščany 23—24 śniežnia, ślizka na darohach užo siońnia

Abvieščany mietearołahami atmaśfierny front, centralnaja častka jakoha ŭ subotu pryniasie ŭ Biełaruś škvalisty viecier, pačaŭsia siońnia apadkami śniehu, i vyklikaŭ uskładnieńnie situacyi na darohach bolšaj častki krainy.

Abłasnyja DAI paviedamlajuć pra vialikuju kolkaść avaryj praź śniežny płast na zaledzianiełych raniej darohach. Pradstaŭniki DAI źviartajucca da kiroŭcaŭ z prośbaj dapasoŭvać chutkaść aŭtamabila da isnujučych darožnych umovaŭ — i pavialičvać adlehłaści pamiž mašynami na ślizkaj pavierchni, kab paśpieć zatarmazić u vypadku patreby.

Pavialičyć

U piatnicu pa bolšaj častcy krainy śniehapady praciahnucca, što moža dadatkova ŭskładnić darožnuju abstanoŭku.

Dniom u subotu, 23 śniežnia, pa paŭnočna-zachodniaj častcy krainy i ciaham u sutak u niadzielu, 24 śniežnia, na bolšaj častcy terytoryi Biełarusi čakajecca ŭzmacnieńnie vietru paryvami da 15—20 m/s.

U piatnicu, 22 śniežnia, na bolšaj častcy terytoryi krainy projdzie śnieh, mokry śnieh, pa zachadzie z daždžom.

Tempieratura pavietra ŭnačy ad nula da minus 5, pa ŭschodzie pry prajaśnieńniach — 6—8 hradusaŭ marozu. Dniom ad minus 3 da +3.

U Minsku ŭnačy čakajecca minus adzin — try marozu, dniom kala nula, śnieh.

U subotu, 23 śniežnia, niaŭstojlivy charaktar nadvorja ŭ krainie abumoviać atmaśfiernyja franty z Bałtyjskaha mora. Na bolšaj častc krainy projdzie karotkačasovy śnieh, mokry śnieh.

Tempieratura pavietra ŭnačy składzie ad nula da minus 6, udzień — ad minus 3 da plus 3 hradusaŭ.

Charaktar nadvorja ŭ niadzielu istotna nie źmienicca. U mnohich rajonach prahnazujucca apadki (mokry śnieh, jaki budzie pierachodzić u doždž). Na bolšaj častcy terytoryi krainy čakajecca ŭzmacnieńnie vietru paryvami da 15-20 m/s. Tempieraturny fon budzie pavyšacca. Unačy prahnazujecca ad minus 3 da plus 3 hradusaŭ. Dniom — ad nula da plus 6, pa paŭdniovym zachadzie — da 8 hradusaŭ ciapła.

Na Kalady, u paniadziełak, budzie niaŭstojlivaje z apadkami nadvorje. Na bolšaj častcy terytoryi projduć apadki ŭ vyhladzie daždžu i mokraha śniehu. U niekatorych rajonach mahčyma ŭzmacnieńnie vietru paryvami da 15—20 m/s. Tempieratura pavietra na praciahu sutak — ad nula da plus 6 hradusaŭ. Nočču pa paŭnočnym uschodzie — 1—5 hradusaŭ marozu, dniom u paŭdniova-zachodnich rajonach — 7—8 hradusaŭ ciapła.

U aŭtorak i sieradu, 26-27 śniežnia, nadvorje budzie vyznačać ciopłaja pavietranaja masa, jakaja pastupaje z paŭdniovaha zachadu Jeŭropy. U niekatorych rajonach čakajecca mokry śnieh i doždž.

Tempieratura pavietra ŭnačy składzie ad minus 3 pa paŭnočnym uschodzie da plus 4 hradusaŭ pa paŭdniovym zachadzie, dniom — ad nula da +7.

• 0
• 0
• 0
• 0
• 0
• 0
• 0
• 0