Sprava «Biełaha lehijona», jakaja pačałasia ź lista «frau A.» Łukašenku, spyniena
27 listapada spynieny kryminalny pieraśled usich udzielnikaŭ spravy «Biełaha lehijonu». Materyjały spravy pieradadzienyja ŭ prakuraturu. Pra heta zajaviŭ 30 listapada kiraŭnik SK Ivan Naskievič na pres-kanfierencyi ŭ Mahilovie, piša Tut.by.
«Papiaredniaje rasśledavańnie pa kryminalnaj spravie skončana. 27 listapada śledčym pryniata rašeńnie ab spynieńni kryminalnaha pieraśledu ŭsich fihurantaŭ pa spravie i ab spynieńni samoha rasśledavańnia kryminalnaj spravy.
My ličym, što ŭ hetaj spravie pastaŭlena kropka.
Kryminalnaja sprava nakiravanaja prakuroru dla vyvučeńnia i acenki zakonnaści pryniataha rašeńnia. Usie fihuranty pa spravie ŭ sapraŭdny momant pačali aznajamleńnie z pastanovaj ab spynieńni i z materyjałami spravy pa ich chadajnictvie», — paviedamiŭ Ivan Naskievič.
Sprava «Biełaha lehijona» pačałasia ŭ sakaviku napiaredadni Dnia Voli, u časie chvali pratestaŭ suprać źnižeńnia ŭzroŭniu žyćcia.
21 sakavika Alaksandr Łukašenka zajaviŭ, što zatrymana niekalki dziasiatkaŭ bajevikoŭ, jakija «treniravalisia ŭ łahierach sa zbrojaj» u Biełarusi i za miažoj, a taksama rychtavali pravakacyi. Pačalisia zatrymańni.
U vyniku pa spravie ab padrychtoŭcy masavych biesparadkaŭ prachodziła 35 čałaviek. Ź ich 20 abvinavačvalisia jašče i pa artykule ab niezakonnym uzbrojenym farmiravańni. Siarod zatrymanych byli dziejnyja i byłyja supracoŭniki pamiežnych vojskaŭ, Uzbrojenych sił, MNS i Unutranych vojskaŭ.
U minułym niekatoryja ź ich — aktyvisty niezarehistravanaha spartyŭna-patryjatyčnaha kłuba «Bieły lehijon» (spyniŭ dziejnaść 15 hadoŭ tamu) i aficyjnaha kłuba «Patryjot» dla padletkaŭ u Babrujsku. Jašče niekalki čałaviek — aktyvisty niezarehistravanaha ŭ Biełarusi «Maładoha frontu».
Dziaržaŭnyja telekanały pakazali kadry pieratrusaŭ i jak, nibyta, kanfiskoŭvałasia zbroja. Hazieta «SB. Biełaruś Siehodnia» pisała, fihuranty adpracoŭvali bajavyja navyki, viali ideałahičnuju padrychtoŭku i nazyvali svajoj metaj «abaronu krainy ad ahresara».
Udakładniałasia, što sprava pačałasia ź lista niejkaj «frau A.» na imia Łukašenki: nibyta hramadzianka Hiermanii ź biełaruskimi karaniami paviedamiła ab «pravakacyjach» na 25 Sakavika ŭ Minsku.
Niahledziačy na toje, što sprava atrymała rezanans, aficyjna jaje kamientavali redka.
U červieni KDB spyniŭ kryminalny pieraśled fihurantaŭ spravy ab biesparadkach. A rasśledavańnie pra ŭzbrojenyja farmiravańni pieradali śledčamu kamitetu (darečy, heta pieršaja sprava pa takim artykule ŭ krainie).
Tady ž fihurantaŭ pastupova vypuścili ź SIZA pad padpisku ab niavyjeździe i nierazhałošvańni. Ź niekatorych i zusim źniali abvinavačvańni. Ale rasśledavańnie praciahnułasia.
Pry hetym kiraŭnik KDB Valeryj Vakulčyk u červieni papiaredžvaŭ, što «pakul zaŭčasna kazać, ci dojdzie da sudu» sprava «Biełaha lehijona», a staršynia Śledčaha kamiteta Ivan Naskievič abiacaŭ «na praciahu vosieni» pastavić kropku.
Kamientary