20-hadovy rabotnik fiermy Zak Mitčeł paciarpieŭ ad dziejańniaŭ raźjušanaha byka: chirurhi nie zmahli vyratavać vialiki palec na pravaj ruce aŭstralijca, tamu skarystalisia jaho anałaham na nazie ŭ jakaści zamieny, piša VVS.
Mitčeł atrymaŭ traŭmu jašče ŭ krasaviku, kali byk ź siłaj ucisnuŭ jaho ruku ŭ aharodžu zahonu.
Jak zaŭvažyŭ sam Mitčeł, niepasredna paśla incydentu jaho kalehi pa fiermie ŭ Zachodniaj Aŭstralii sprabavali vyratavać palec, kinuŭšy jaho ŭ kuler ź lodam.
Zaka pieravieźli na viertalocie ŭ stalicu štata — Piert.
Mitčełu daviałosia za try miesiacy pieranieści dźvie niaŭdałyja apieracyi, u chodzie jakich lekary daremna sprabavali viarnuć adarvany palec na miesca. Adnak zatym chirurhi znajšli nietypovaje vyjście: jany pierakanali junaka, što pierasadka vialikaha palca nahi viernie jaho dałoni zhublenuju funkcyjanalnaść.
Mitčeł spačatku adniekvaŭsia i doŭha razvažaŭ, ale potym pahadziŭsia, i dva tydni tamu ŭ Sidnejskaj vočnaj balnicy prajšła redkaja apieracyja, jakaja doŭžyłasia bolš za vosiem hadzin.
Hałoŭny płastyčny chirurh balnicy Šon Niklin nie byŭ ździŭleny tym, što rabotniku fiermy spatrebiłasia stolki času na rozdumy.
«Na pieršy pohlad, heta varjackaja ideja — pacyjenty nie chočuć, kab kalečyli inšuju častku ich cieła. Ale navat z čatyrma pracoŭnymi palcami [ruki] vam budzie nie chapać «zacisku» dla paśpiachovaha zachopu čaho-niebudź, i vaša dałoń stracić značnuju častku svajoj funkcyjanalnaści», — padkreśliŭ doktar Niklin.
Ciapier Mitčeła čakajuć 12 miesiacaŭ reabilitacyi, ale jon choča viarnucca da pracy z bydłam.
U balnicy asabliva padkreślili, što pierasadka cełaha vialikaha palca — vielmi niestandartnaja praktyka na dadzieny momant, adnak transpłantacyi jaho frahmientaŭ užo ŭvajšli ŭ štodzionnaść płastyčnaj chirurhii.
«Mnohija bajacca, što [pry pierasadcy palca nahi] ich chada i pramachadžeńnie pacierpiać, adnak, jak praviła, heta nie tak», — supakojvaje doktar Niklin.
Karen Mitčeł — maci paciarpiełaha Zaka — radujecca, što jaje syn chutka idzie na papraŭku: «Dva tydni prajšło z apieracyi, a jon užo amal jak raniej chodzić».
-
Antarktyda maje «hravitacyjnuju dzirku». Što heta takoje i ci niasie pahrozu płaniecie?
-
«Jandeks Braŭzier» analizuje navat asabistyja paviedamleńni. Voś jakija źviestki źbirajuć braŭziery i čamu heta važna
-
Na karybskim vostravie vypraboŭvajuć inavacyjnuju sistemu chvalevaj enierhietyki i apraśnieńnia vady
Kamientary