«Kulalisia, spatykalisia, ale heta było mahutnaje prasoŭvańnie napierad»
U Bieraści Miadźviedzieŭ z Łukašenkam nie paškadavali patetyčnaj rytoryki dziela šyrokaj publiki, adnak u vuzkim kole dy sam-nasam havorka vyhladała peŭna ž nia tak paradna. Piša ŭ svaim błohu Alaksandar Kłaskoŭski.
22 červienia ŭ Bieraści Miadźviedzieŭ z Łukašenkam nie paškadavali patetyčnaj rytoryki dziela šyrokaj publiki, adnak u vuzkim kole dy sam-nasam havorka vyhladała peŭna ž nia tak paradna. Pa vynikach pieramoŭ pryniataja deklaracyja z ahulnych tezaŭ pra vyniki vajny dy pahłybleńnie intehracyi.
Rytualny anturaž byŭ zručny dla vysokaha hościa: jahony liberalny imidž nie paciarpieŭ. Nu ŭ kaho jazyk pavierniecca hanić: prylacieŭ ža nie ŭ "apošniuju dyktaturu Eŭropy", a na śviatuju ziamlu, palitaju kryvioju ŭdzielnikaŭ supolnaha zmahańnia!
Admietny momant: aficyjnyja lidery asudzili ŭ supolnaj deklaracyi sproby revizavać vyniki druhoj suśvietnaj vajny, ale pry hetym Miadźviedzieŭ prahavaryŭsia, što na pieramovach "była zroblenaja revizija roznych prajektaŭ, ruchu pa roznych kirunkach našaha ŭzajemadziejańnia". Takim čynam, kolišniaje sumiesnaje hnijeńnie ŭ akopach zusim nie zabiaśpiečyła pośpiechu "bratniaj intehracyi". Mitalahizavanyja rytualnyja rečy i realnaje žyćcio razyšlisia. Jašče bolej, užo miž Maskvoju dy Mienskam razharnułasia čarada vojnaŭ: cukrovych, piŭnych, hazavych i h.d.
Pakručasty siužet realizacyi sajuznaha prajektu Alaksandar Łukašenka acharaktaryzavaŭ afarystyčnaj frazaj-aksiumaranam pra "vosiem hadoŭ (z času padpisańnia sajuznaje damovy ŭ 1999-m. — A.K.), jakija my, pracujučy, kulalisia, spatykalisia, ale heta było mahutnaje prasoŭvańnie napierad". Pryniataj ŭ Bieraści deklaracyjaj baki zaśviedčyli namier "pahłyblać" voś hetakuju supiarečlivuju intehracyju.
Zrazumieła, tekst vynikovaha dakumentu rabiŭsia zahadzia i pavodle vyznačeńnia nia moh adlustravać sapraŭdny siužet dyjalohu. Chacia i ŭ hetym vylizanym, taksama ŭ značnaj stupieni rytualnym tekście daśviedčanaje voka bačyć dramu supiarečnaściaŭ: Maskva padkreślivaje imperatyŭ rynkavych dačynieńniaŭ, Miensk nahadvaje ab pryncypach vialikaj damovy 1999 hodu, u jakoj niabožčyk Jelcyn ščodra advaliŭ pravoŭ biełaruskamu boku.
Napiaredadni sustrečy ŭ Bieraści kramloŭskija krynicy biez ekivokaŭ artykulavali: razmova pojdzie pra enerhanośbity i ŭvieś kompleks ekanamičnych ŭzajeminaŭ, jakija rasiejski bok budzie i nadalej paśladoŭna pieravodzić na rynkavy hrunt. Padtekst: "ovies nynčie doroh", tak što na tanny haz nie spadziavajciesia!
Ambasadar Surykaŭ i ludzi z "Hazpromu" ćvierdziać pra 200 dalaraŭ z novaha hodu. I tak, maŭlaŭ, atrymajecca ŭdvaja tańniej, čym dla Zachodniaj Eŭropy. Što jość čystaj praŭdaj. Ekanamisty kažuć, što de-fakta rasiejski enerhietyčny hrant Biełarusi navat vyras, bo pad zajavy pra pierachod da prahmatyčnych stasunkaŭ nažnicy miž canoj dla praklatych buržuinaŭ i dla bratkoŭ-biełarusaŭ jašče paboleli na našu karyść.
Miž tym biełaruski ŭrad zakładaje ŭ biudžet-2009 haz pa 140 dalaraŭ i daŭno padbivaje kliny, kab uvohule pierajhrać tuju čortavu "eŭrapiejskuju formułu", na jakuju Miensk musiŭ zhadzicca ŭ fors-mažornych varunkach, amal što pad boj kurantaŭ na miažy 2007 hodu. Tutejšyja čynoŭniki pryvodziać "žalezny" arhument: nia dumali, što budzie tak doraha! Pry hetym maŭčać, što taja ž šalonaja kańjunktura na rynku enerhanośbitaŭ dazvalaje Biełarusi ź vialikim navaram pradavać na Zachad naftapradukty.
22 červienia ŭ Bieraści Miadźviedzieŭ zajaviŭ, što "sajuznuju dziaržavu" treba napoŭnić realnym źmiestam. Jaki źmiest ŭkładaje ŭ hety prajekt Maskva, my prykładna ŭjaŭlajem. Kaniečnie, usio maskujecca eŭfemizmami. Kštałtu: treba prasoŭvać valutnuju intehracyju (čytaj: uvodźcie rasiejski rubiel!). I h.d. Letaś ŭ žniŭni, padčas čarhovaha kanfliktu vakoł hazu, Alaksandar Łukašenka pryznaŭsia: pry słovach pra raŭnapraŭny źviaz u Maskvie tolki "nadzimajuć ščoki".
I jašče tady było jaskrava rastłumačana (dazvolu sabie vialikuju cytatu, pra jakuju mnohija zabylisia): "Što kanceptualna, u cełym choča ad nas Rasieja — heta ŭžo dla vas nie sakret. Ja dazvolu sabie ŭpieršyniu hučna ab hetym skazać: Rasieja chacieła b pryvatyzavać nia tolki asobnyja pradpryjemstvy, jakija my ŭ siaredzinie 90-ch hadoŭ (kali pradpryjemstvy "stajali na kaleniach", kali 30 dalaraŭ byŭ samy vysoki zarobak) uźnimali za košt našaha dabrabytu… Dyk voś, jany chočuć pryvatyzavać nia tolki hetyja pradpryjemstvy, niachaj by pryvatyzavać — biaspłatna prychapić. Jany chacieli b pryvatyzavać usiu krainu!".
Tut niama padstaŭ nia vieryć aficyjnamu kiraŭniku, ź jakim tet-a-tet sprabujuć "vyrašyć pytańni" rasiejskija tuzy.
Dyk voś, kali razabracca, adkinuć rytualnyja zajavy pra hatovaść lehčy pad tanki, dyk treba kanstatavać, što siońnia ekspansija nasoŭvajecca na nas ŭžo nia z zachadu, a z supraćlehłaha boku.
Zrešty, akurat napiaredadni vizytu Miadźviedzieva biełaruskamu načalstvu zrabili padarunak amerykancy na paru ź letuvisami, ciškom raspačaŭšy pieramovy pra raźmiaščeńnie supraćrakietaŭ na vypadak, kali Vašynhton nie damovicca z naturystymi palakami :) Kaciroŭki "biełaruskaha placdarmu" adrazu vyraśli. Chočuć rasiejcy atrymać hrunt dla "asymetryčnaha adkazu" — chaj nia buduć žmindami!
ZY. Łukašenka zaprasiŭ hościa ŭ Viskuli. Tak što kropki nad "i" nie rasstaŭlenyja.
ZYY. U paniadziełak "Kommiersant'" reziumavaŭ, što, miarkujučy pa vynikach pieramoŭ u Bieraści, "nijakich praryŭnych rašeńniaŭ u dačynieńniach dźviuch krainaŭ čakać nie vypadaje". Šerah nahladalnikaŭ robiać vysnovu: vizyt akazaŭsia-taki pieravažna rytualnym, a vostryja pytańni (haz dy inš.) prosta adsunutyja na potym.
Ciapier čytajuć
«Tufli — 400 rubloŭ». Vypuskniki dzielacca, u kolki abyšlisia ich vobrazy8
Kamientary