U Rya ŭsie skardziacca na vadu: pitnuju nielha ŭžyvać biez naležnaj filtracyi, sinchranistkam adrazu nie spadabałasia ŭ basiejnie («zanadta kałamutnaja vada»), a što ž rabić tryjatłanistam, vietraźnikam i płyŭcam u adkrytaj vadzie? Zusim chutka im treba budzie razyhryvać miedali, a vada ŭ zalivie Huanabara, miakka kažučy, brudnaja.
Štat Rya i pradprymalnik Ejkie Batysta abiacali śpiecyjalna da Alimpijady ačyścić buchtu, u jakuju ŭžo šmat hadoŭ adkryta źlivajuć kanalizacyjnyja vody i adkidy vytvorčaści. Ale pieraškodziŭ palityčny i ekanamičny kryzis. Daj boh, kali ruki dojduć da 2030 hoda.
A pakul prablemy ŭsio tyja ž, što i hod tamu: ściokavyja vody faveł, drobnaje i bujnoje śmiećcie (až da kanapy, jakaja imhnienna stała miemam), inšyja adkidy pastajanna ściakajucca na ŭźbiarežža. Kurortam u akvatoryi nie pachnie, zatoje pachnie čymści inšym.
Kali vy dumajecie, što heta staryja fatahrafii, to pamylajeciesia. Całkam sabie śviežyja, žnivieńskija. Buchtu dla spartsmienaŭ ačyścili, jak zmahli, ale śćviardžać, što čarhovaja kanapa nie ŭspłyvie padčas alimpijskich startaŭ, nielha.
Hod tamu miedyki i ŭvohule bili tryvohu: ploskacca ŭ Huanabary było niebiaśpiečna dla zdaroŭja: kali praz rot, vočy abo drapinu na ciele ŭ arhanizm trapiać try čajnyja łyžki vady, imaviernaść zarazicca chaleraj abo dyzienteryjaj padlacić da 99%. Kali pašancuje mienš, možna źlehčy z chvarobami dychalnych šlachoŭ, mozhu i serca.
Ciapier byccam takich strašyłak niama, ale ryzyka zarazicca zastajecca.
Ciapier čytajuć
Chto zabaraniaje ŭ Biełarusi knihi — voś hetyja 22 čałavieki33
Kamientary