Prybirać pavalenyja ŭrahanam drevy ŭ lasach buduć da nastupnaha hoda
Urahan, jaki prajšoŭ u Minsku i Minskaj vobłaści 13 lipienia, staŭ samym razburalnym dla lasnoj haspadarki za ŭsiu historyju Biełarusi. Bolš za inšych paciarpieli lasy Smalavickaha, Červieńskaha, Biarezinskaha, Baraŭlanskaha i Mazyrskaha lashasaŭ. Bura pavaliła kala 10 000 hiektaraŭ nasadžeńniaŭ. Rasčyščać i prybirać hetyja zavały śpiecyjalisty płanujuć kala piaci miesiacaŭ.
— Da 1 studzienia 2017 hoda my płanujem prybrać draŭninu na dastupnych miescach i da 1 sakavika — na ciažkadastupnych, — paviedamiŭ ministr lasnoj haspadarki Michaił Amieljanovič. — U nas užo jość dośvied uborki takich lesasiek. U 2008-m my likvidavali nastupstvy mocnaha ŭrahanu ŭ Biarezinskim i Červieńskim rajonach. Adnak, kali tady hałoŭnymi byli bienzapiła, valščyk i lesarub, to ciapier staŭka na techniku — charviestary i forvardary.
Navodzić paradak u lasach buduć śpiecyjalisty z usioj krainy. Dapamahać, naprykład, Smalavickamu rajonu voźmucca lashasy Minskaj vobłaści, a Červieńskamu — lashasy piaci astatnich abłaściej.
— Rabić usio budziem apieratyŭna. Technika budzie pracavać kruhłyja sutki. Apieratary i ich kiraŭniki pasielacca ŭ vahončykach z usimi vyhodami naŭprost kala lesu, — praciahvaje Michaił Amieljanovič. — U vypadkach, kali na miesca pryjedzie šmat rabočych, ich raźmieściać u vioscy ci namiotavym łahiery. Sa śviatłom, vadoj, zabiaśpiečać centralizavanaje charčavańnie.
Dapamahajuć leśnikam razhrabać lasnyja zavały i pryvatniki, što zajmajucca lesam. Draŭnina z paciarpiełych ad bury terytoryj u asnoŭnym pojdzie na pradpryjemstvy kancerna «Biellespapierapram». Lišak, u tym liku drobnatavarnaja draŭnina, pojdzie na ekspart. Hałoŭnyja pakupniki — Polšča, krainy Prybałtyki i Skandynavii.
Nabyvać sadžancy, kab adnavić paškodžanyja lasy, Minlashas nie płanuje.
— Pasadkavaha materyjału ŭ nas dastatkova, — adznačyŭ ministr.
Ciapier čytajuć
U Čechii małady biełarus trapiŭ u komu — nahłytaŭsia tabletak praz prablemy ź lehalizacyjaj i razryŭ ź dziaŭčynaj2
Kamientary