Jašče adzin paciarpieły pa spravie Japryncavych paviedamiŭ sudu, što źviarnucca z zajavaj u KDB jamu paraiŭ Juryj Čyž

Jašče adzin paciarpieły pa spravie Japryncava — rasijski biźniesmien Juryj Saviak — paviedamiŭ, što źviarnucca z zajavaj u KDB na Japryncava i Arabiana jamu paraiŭ Juryj Čyž. Pra heta Saviak paviedamiŭ 11 lipienia padčas dačy pakazańniaŭ u sudzie Centralnaha rajona Minska.

Sud nad biźniesmienami Uładzimiram Japryncavym, jaho synam Kaźbiekam i partnioram Japryncava-małodšaha, namieśnikam hiendyrektara kampanii «TMST» Alaksandram Arabianam pačaŭsia 4 lipienia. Paciarpiełymi pa spravie pryznanyja troje: dyrektar kampanii «Haztrans» (Estonija) Andrej Rabcevič, supracoŭnik «Vitalura», u minułym viadomy lohkaatlet Andrej Michnievič i rasijski biźniesmien Juryj Saviak. Rabcevič i Michnievič dali pakazańni na minułym tydni. Dopyt Saviaka pačaŭsia siońnia.

Pavodle słoŭ Saviaka, zajavu ŭ KDB jon napisaŭ 11 žniŭnia 2015 hoda (dzień zatrymańnia Uładzimira Japryncava). «Ja padjechaŭ da Čyža. Kažu: treba kudyści ruchacca — voś u mianie harantyi «Trajpła» (ab viartańni hrošaj, jakija davalisia Japryncavu). Jon spačatku abvinavaciŭ mianie, što ja ŭ zmovie ź Japryncavym: maŭlaŭ, mnie najaŭnymi ŭžo ŭsio viarnuli. A potym paraiŭ napisać zajavu ŭ KDB», — raskazaŭ Saviak.

Varta zaznačyć, što raniej anałahičnaja infarmacyja prahučała ad paciarpiełaha Andreja Michnieviča. Jamu Čyž paraiŭ napisać u KDB na Kaźbieka Japryncava, matyvujučy heta tym, što tak bolš šancaŭ viarnuć hrošy.

Viadoma taksama, što 11 žniŭnia 2015 hoda zajavu na svajho kampańjona Japryncava-starejšaha ŭ KDB napisaŭ i Juryj Čyž. Tekst zajavy budzie abvieščany paśla taho, jak Čyža dapytajuć u sudzie ŭ jakaści śviedki — pra heta paviedamiŭ 5 lipienia na pracesie prakuror Juryj Šarśnioŭ. Sam Čyž voś užo niekalki miesiacaŭ znachodzicca ŭ SIZA pa abvinavačvańni va ŭchileńni ad vypłaty padatkaŭ.

Siońnia ŭ sudzie Saviak raskazaŭ, što prapanova ŭkłaści hrošy ŭ naftavy biźnies kampanii «Trajpł» jamu pastupiła letam 2013 hoda. «Dumki, što niešta pojdzie i nie vierniecca, nie było. U ich prystojnaści ja nie sumniavaŭsia», — raskazaŭ Saviak.

Turbavacca za svaje hrošy Saviak pačaŭ vosieńniu 2014 hoda. Pavodle słoŭ rasijskaha biźniesmiena, jon kazaŭ i Japryncavu-starejšamu, i Čyžu, što jość dva šlachi — albo jany viartajuć hrošy, albo budzie isk u aŭstryjski sud (Saviak žyvie ŭ Vienie).

«Z Čyža jakraz źniali sankcyi (majucca na ŭvazie sankcyi ES. — BiełaPAN.), nikomu nie patrebny byŭ šum. A ŭ studzieni 2015 hoda mnie pryjšoŭ śvift (mižnarodnaja mižbankaŭskaja sistema pieradačy infarmacyi i ździajśnieńnia płaciažoŭ. — BiełaPAN.) na 45 młn. jeŭra ad Arabiana», — raskazaŭ paciarpieły.

Takich śviftaŭ było šmat, i z roznych rachunkaŭ, ale pa fakcie hrošy da Saviaka tak i nie dajšli. «Ja biahu ŭ svoj bank, dastaju vice-prezidenta, pačynajuć šukać hrošy, a tam ničoha niama — voś takaja kłaŭnada pačałasia», — raspavioŭ jon.

Kaźbieka Japryncava paciarpieły bačyŭ apošni raz u červieni 2015 hoda. «Jon z Vałodziem (Japryncavym. — BiełaPAN.) pryjechaŭ u Maskvu, skazaŭ, što prajhraŭ usie hrošy. Ja adkazaŭ, što bolš ruku jamu nie padam. Skazaŭ, « ty zhańbiŭ baćku, zhańbiŭ Čyža». Dla mianie heta čałaviek, jakomu ja nie pacisnu ruku», — paviedamiŭ Saviak.

Pavodle jaho słoŭ, Japryncaŭ-starejšy na apošniaj sustrečy harantavaŭ jamu viarnuć hrošy.

Paśla pakazańniaŭ Juryja Saviaka ŭ sudzie byŭ abvieščany pierapynak da 12 lipienia.

***

Historyja z zatrymańniem baćki i syna Japryncavych źviazanaja ź vialikimi daŭhami biźniesmienaŭ i niaŭdałaj sprobaj ich viarnuć. Pavodle infarmacyi paciarpiełych, Kaźbiek Japryncaŭ abiacaŭ pastaŭki paliva šerahu zamiežnych kampanij, ale paśla atrymańnia srodkaŭ nie vykonvaŭ svaje abaviazacielstvy. Ździełki byli harantavanyja hrupaj kampanij «Trajpł». Hrošy pieraličvalisia na rachunak kampanii Edena Investments, mažarytarnym uładalnikam jakoj źjaŭlajecca Japryncaŭ-małodšy, ale paliva partniory tak i nie atrymali.

Kab viarnuć daŭhi, suma jakich składaje niekalki dziasiatkaŭ miljonaŭ dołaraŭ, Kaźbiek Japryncaŭ, pavodle danych śledstva, spačatku sprabavaŭ zarabić na foreksie, ale prahareŭ i zatym źviarnuŭsia pa dapamohu da svajho baćki Uładzimira Japryncava. Toj, u svaju čarhu, źviarnuŭsia pa dapamohu da svajho siabra, prezidenta Fiederacyi spartyŭnaj baraćby Rasii Michaiła Mamijašvili, siabra Juryja Saviaka, jaki pahadziŭsia dać Japryncavu bujnuju sumu pad harantyi jaho doli ŭ kampanii «Trajpł». Paśla zatrymańnia Uładzimira Japryncava Mamijašvili staŭ saŭładalnikam «Trajpła».

Usie troje padsudnych nie pryznajuć svajoj viny. Pry hetym Japryncaŭ-starejšy pahadziŭsia dać pakazańni ŭ luby čas, małodšy — paśla dopytu śviedak, a Arabian ad pakazańniaŭ pakul admaŭlajecca.

• 0
• 0
• 0
• 0
• 0
• 0
• 0
• 0