Były top-mieniedžar «Prastora» vyvodzić na rynak Biełarusi dackuju kampaniju JYSK — kankurenta IKEA
Dacki rytejler JYSK, jaki zajmajecca realizacyjaj tavaraŭ dla doma, abviaściŭ pra vychad na biełaruski rynak.
U kampanii, jakaja źjaŭlajecca adnym z kankurentaŭ šviedskaj IKEA, źviarnuli ŭvahu na toje, što biełarusy davoli častyja naviedvalniki takich kram u krainach Bałtyi, i vyrašyli ŭžo ŭ listapadzie zapuścić u Minsku pieršy padobny handlovy abjekt. Hłabalnaja meta — na praciahu 10 hadoŭ adkryć u Biełarusi 25 «juskaŭ».
Handlovuju sietku JYSK zasnavaŭ Łars Łarsien u 1979 hodzie ŭ Danii. Siońnia jana naličvaje bolš za 2300 kram i za 20 tys. supracoŭnikaŭ u 41 krainie śvietu (pieravažna ŭ Jeŭropie). Hadavy abarot sietki — 2,9 młrd jeŭra. Kampanija aktyŭna viadzie svaju dziejnaść u krainach Bałtyi, Polščy i Ukrainie. U Rasii kram JYSK niama.
Adkryć svoj pieršy mahazin u Minsku dackaja sietka płanuje ŭžo na pačatku listapada, paviedamiła TUT.BY dyrektar pa markietynhu JYSK u krainach Bałtyi i Biełarusi Anžalika Zoryna. «Miescaznachodžańnie pieršaj kramy i kankretnaja data adkryćcia jašče nie viadomyja, bo mahčymyja łakacyi jašče znachodziacca na stadyi abmierkavańniaŭ», — skazała jana. JYSK pakul razhladaje varyjant tolki arendy płoščaŭ, nie vykuplajučy ich.
Abjom inviestycyj u adkryćcio pieršaha abjekta sietki składzie kala paŭmiljona jeŭra. «Kampanija zachodzić u Biełaruś praź isłandskuju kampaniju, jakaja vałodaje franšyzaj ŭ Prybałtycy, Kanadzie, Isłandyi i Biełarusi. Franšyza — całkam skandynaŭski biznes i inviestycyi», — skazała Zoryna.
«Jusk» užo pačaŭ padbor klučavych supracoŭnikaŭ dla pracy ŭ Biełarusi. Tak, dyrektaram pa raźvićci biznesu JYSK u Biełarusi staŭ Ivars Kraŭčuns, jaki da hetaha pracavaŭ u «Prastory» kamiercyjnym dyrektaram.
Pa słovach ekśpiertaŭ, dla JYSK važna zaniać rynak raniej za jaje asnoŭnaha kankurenta ŭ Jeŭropie — šviedskuju IKEA, jakaja pakul admoviłasia ad raźvićcia ŭ Biełarusi. Zoryna ž śćviardžaje, što adsutnaść IKEA nie źjaŭlajecca asnoŭnaj pryčynaj vychadu na rynak Biełarusi. «U Litvie IKEA prysutničaje i biźnies JYSK paśpiachova praciahvaje raźvivacca», — kaža jana. «U Biełarusi jość patencyjał dla JYSK, bo ŭžo ciapier u Bałtyi my bačym pakupnikoŭ ź Minska, jakija naviedvajuć našy kramy», — dadała dyrektar pa markietynhu.
Anžalika Zoryna paviedamiła, što ŭ kramach JYSK buduć pradstaŭlenyja tradycyjnyja dla hetaj sietki tavary, u tym liku biełaruskaj vytvorčaści. «My pravodzim pieramovy ź biełaruskimi kampanijami, i jany buduć abaviazkova prysutničać u našych kramach. Naša kamanda ciapier pracuje na toje, kab mieć dobraja prapanovy dla pakupnikoŭ u Biełarusi, asabliva ŭ takich katehoryjach, jak mebla i tekstyl dla doma», — reziumavała Zoryna.
Kamientary