DAI tłumačyć uzmacnieńnie ŭvahi da matacyklistaŭ pačatkam siezonu i prafiłaktykaj avaryjnaści

Pavyšanaja ŭvaha DAI da matacyklistaŭ abumoŭlenaja pačatkam motasiezona, padvyšanaj avaryjnaściu i praviadzieńniem z 15 pa 29 krasavika prafiłaktyčnaj akcyi «Motaruch biez parušeńniaŭ!», paviedamiła načalnik adździeła ahitacyi i prapahandy DAI Minska Žanna Juran.

18 krasavika pačała źjaŭlacca infarmacyja pra toje, što supracoŭniki DAI masava kanfiskoŭvajuć matacykły ŭ staličnych bajkieraŭ čaściej za ŭsio na padstavie pravierki identyfikacyjnaha numara transpartnaha srodku. Paviedamlałasia, što za apošnija sutki na štrafstajanki dastaŭlena kala 30 matacykłaŭ. Bajkiery pišuć u sacsietkach, što kanfiskacyi praciahvajucca i siońnia. Niekatoryja źviazvajuć abvastreńnie situacyi z darožnaj avaryjaj z udziełam matacyklista i supracoŭnika DAI, jakaja zdaryłasia ŭ centry Minska ŭčora.

Jak adznačyła Juran, z pačatku hoda ŭ stalicy piać čałaviek zahinuli ŭ DTZ, ź ich dvoje — kiroŭca i pasažyr matacykła (avaryja adbyłasia ŭ pačatku krasavika na skryžavańni vulicy Hamarnika i Łahojskaha trakta). «Praktyčna 40% zahinułych — mienavita hetaja katehoryja», — padkreśliła jana.

Kamientujučy viersiju pra toje, što padvyšanaja ŭvaha da matacyklistaŭ źviazanaja z DTZ z udziełam matacyklista i supracoŭnika DAI, Juran adznačyła, što zdareńnie z dvuma zahinułymi na Łahojskim trakcie mieła nie mienšy rezanans. «Tady taksama kazali, što znoŭ DAI tut lutuje suprać matacyklistaŭ. Kali b my nijak nie zreahavali ni na adno, ni na druhoje zdareńnie, heta było b, mnie zdajecca, dziŭna. Ale kali pavialičvajecca kolkaść zdareńniaŭ z udziełam matacyklistaŭ, napeŭna, treba niejkim čynam reahavać, u tym liku ŭzmacniać pracu», — adznačyła jana.

Pry hetym pradstaŭnik DAI adznačyła, što kali kiroŭcy nie parušajuć praviły darožnaha ruchu, majuć adpaviednuju katehoryju, ich dakumienty ŭ paradku, mašyna abo matacykł zarehistravany, prajšoŭ techahlad i h. d., to prablem z DAI nie paŭstanie niezaležna ad taho, čym kiruje kiroŭca — aŭtamabilem ci matacykłam.

Kažučy pra pryčyny kanfiskacyi transpartnych srodkaŭ, Juran adznačyła, što i matacykł, i aŭtamabil mohuć kanfiskavać, kali kiroŭca znachodziŭsia ŭ stanie ałkaholnaha apjanieńnia, nie mieŭ prava kiravańnia peŭnaj katehoryi, albo kali ŭ supracoŭnikaŭ DAI paŭstali sumnievy ŭ identyfikacyjnym numary kuzava.

Supracoŭniki DAI pavinny dastavić transpartny srodak na achoŭnuju stajanku, a materyjały — pieradać u adpaviednyja adździeły ŭ zaležnaści ad taho, što buduć vyśviatlać ekśpierty (naprykład, prykmiety pierabiŭki numara). Terminy praviadzieńnia takoj pravierki Juran nazvać nie zmahła.

Kamientujučy toj fakt, što matacyklisty jakraz i nazyvajuć pravierku numara ramy jak asnoŭnuju pryčynu kanfiskacyi, Juran adznačyła: «Heta jany tak kažuć. Nie fakt, što tak i było. Nakolki ja viedaju sa statystyki, navat na adkryćci bajk-źlotu 16 krasavika z tych parušeńniaŭ, jakija byli vyjaŭlenyja, dosyć vialikaja kolkaść [matacyklistaŭ] była naohuł biez katehoryi. Ale pryjechali na bajk-źlot, viedajučy, što tam buduć supracoŭniki DAI, jakija buduć kantralavać».

Tym časam adzin z bajkieraŭ sa spasyłkaj na svaje krynicy paviedamiŭ, što načalstva DAI dało tolki vusnaje, ale abaviazkovaje da vykanańnia ŭkazańnie zabirać na štrafstajanku usie spartyŭnyja matacykły, a astatnija — kali ŭ ich adsutničaje rehistracyjny numar ci jość prablemy z dakumientami.

«U ich užo prydumany adkaz na ŭsie pytańni, i nie dakapaješsia. Matacykły buduć utrymlivać da kanca siezona, i na pytańnie, čamu tak doŭha, budzie hučać adkaz: «Čarha», — i minimum na try miesiacy», — raspavioŭ matacyklist.

• 0
• 0
• 0
• 0
• 0
• 0
• 0
• 0