TonqiXod raspavioŭ pra svaju muzyku ŭ troch słovach 

Hurt TonqiXod prezentuje na Tuzin.fm mini-albom «Lamant, chaos i verchał». Na dumku muzykaŭ, mienavita hetyja try słovy charaktarazujuć ich muzyku dy pieradajuć źmiest, jak EP, tak i ich budučaha poŭnafarmatnika.

U EP uvajšło try kampazicyi, jakija ŭžo hučali na žyvych vystupach hurtu, ale nie byli zapisanyja. «Paśladoŭnaść trekaŭ nie vypadkovaja, kampazycyi jak muzyčna, tak i sensava pierahukajucca, miescami pieraciakajuć adna ŭ adnu. Možna skazać, što heta dosyć kanceptualny mini-albom. Spačatku heta choład, trymcieńnie, nieruchomaść, kapitulacyja i abmaražeńnie. Ale potym unutranaja pulsacyja nadłomvaje kryhu i vyryvajecca niastrymnaj płyńniu, abrynajecca dołu krynica žyćcia i adnačasova krynica razbureńniaŭ», – raspaviadaje vakalist hurtu Uładź Lankievič. Muzyka zaznačaje, što abranaja nazva dobra pasuje pad ich muzyku – taki karotki źmiest u adnoj frazie.

«Kancepcyja JER dla nas asabista była ŭ tym, kab źmiaścić u mini-albomie karotki źmiest budučaha druhoha poŭnafarmatnika, – kaža suaŭtar muzyki i klavišnik hurtu Maks Subač. – I na moj pohlad heta atrymałasia: «Kamniapad» maje prosty zapaminalny matyŭ, tak by mović, dla masaŭ. «Lamant» – razhornutyja vakalnyja i instrumentalnyja impravizacyi, a «Maroznaja» – niešta pamiž imi abiedźviuma: papsovieńkija liryčnyja matyvy ŭpieramiešku z zakručanymi adstupami, kab nie zasumavać».

«Maroznaja», viadomaja z prajektu «Novaje pakaleńnie na Novy hod», u studyjnym varyjancie była vykananaja bieź Siarhieja Puksta, ale zatoje pry ŭdziele Viktara Siamaški, jaki padyhraŭ u hetym treku na flejcie. Aproč jaho, da tryjo dałučyłasia bluzavaja i džazavaja śpiavačka Volha Bialajeva, jakaja vykanała vakalnuju partyju ŭ druhim treku – ułasna lamant jejny, častkova. «U hetym tvory ŭpieršyniu dla nas hučyć žanočy vakał, jaki zapisała Volha – my da jaje chadzili na ŭroki vakału, praŭda, zakinuli nieŭzabavie. Naohuł ža ŭ hetym treku lamant pa poŭnaj prahramie, hałosić niemaviedama chto – my sami błytajemsia i nia možam zrazumieć, dzie tam čyj hołas», – raspaviadaje Ŭładź Lankievič.

Pra zaklučnuju kampazycyju «Kamniapad» muzyki kažuć tak: heta samaja ich karotkaja pieśnia. Jana atyrmałasia viasiołaj i lohkaj, i TonqiXod zaklikaje jaje padpiavać na kancertach zadornymi hałasami. Materyjał zapisvaŭsia na Mapletree Studio i ŭłasnaj studyi hurtu, a zvodziŭ Pavał Siniła sa studyi EverestMedia. Vokładku da mini-albomu zrabiła mastačka i dyzajnierka Vasilisa Palanina-Kalenda.

Hurt pačaŭ kraŭnfandynhavuju kampaniju ŭ padtrymku svajho druhoha studyjnaha albomu. 

• 0
• 0
• 0
• 0
• 0
• 0
• 0
• 0