Narodžany prapahandaj: rasiejskija telekanały zrabili sabie apanienta

Rasiejskija federalnyja telekanały sami vyrabili apanenta z Ukrainy dla svaich tok-šoŭ — ahladalnica rasiejskaj słužby Radyjo Svaboda Alena Rykaŭcava piša pra «ŭkrainskaha eksperta» Viačasłava Koŭtuna.

Pavialičyć

U efiry federalnych rasiejskich kanałaŭ hety Słava źjaviŭsia kala hodu tamu. Sam jon pryčynu svajho źjaŭleńnia patłumačyŭ sumlenna i niemudrahielista: jaho zaklikali ŭmacoŭvać rejtynhi rasiejskich tok-šoŭ na ŭkrainskija temy.

«Heta rašeńnie Kramla, — prastadušna skazaŭ Słava vydańniu Meduza, — i bieź jaho ŭchvały mianie b nidzie nie było. Prosta rejtynhi kanałaŭ pačali padać, hladzieć tok-šoŭ, dzie ŭsio ŭ adnu dudku dźmuć, stała sumna. A ja ŭ vobraz trapiŭ dakładna, tamu i staŭ zorkaj».

Nu zrazumieła. Stali mienš hladzieć hetyja šoŭ u siłu tatalnaha «odabramsa» ŭ šerahach udzielnikaŭ, spatrebiłasia ich razbavić «banderaŭcami», i Słava paśpiašaŭsia na dapamohu — pradstaŭlać apazycyjny ŭkrainski bok — kab była dyskusija i kab bolš rasiejskich ludziej hladzieła rasiejski televizar. Voś u hetym Słava pavinien byŭ dapamahčy.

Jon dapamahaŭ dobra, pravilna. Jon, z adnaho boku, horača kidaŭsia na abaronu ideałaŭ Majdanu i adstojvaŭ dziejańni ŭkrainskich uładaŭ, ale ź inšaha boku — jon heta rabiŭ da taho prymityŭna, što prosta nia moh nie padstaŭlacca pad adkrytyja naśmieški, a to i ździeki svaich apanentaŭ, jakija da taho ž tradycyjna ŭ try-čatyry razy pieraŭzychodzili siłami Słavu, jaki stajaŭ suprać ich u pary ź jakim-niebudź jaho ukrainskim sajuźnikam.

— Ludzi zakapanyja ŭ jamach u svajoj krainie! — kryčaŭ Słavu pradstaŭnik supraćlehłaha lahieru ŭ apošnim niadzielnym šoŭ Uładzimira Sałaŭjova.

— Ja nia bačyŭ takich jamaŭ, — melanchalična adhukaŭsia Słava, pravakujučy źjedlivuju zaŭvahu, što kali vy čaho-niebudź nia bačyli, heta nia značyć, što hetaha nie isnuje ŭ pryrodzie.

— Vaš šef niepasredny pryjechaŭ, Bajden, skazaŭ: chłopcy, vy raskrali usie hrošy, jakija my vam dali, — ubivaŭ u hałavu Słavu nadzvyčaj ahresiŭny i chamavatyja deputat Dumy Kałašnikaŭ, dla jakoha słova «vy» isnuje tolki dla abaznačeńnia množnaha liku, persanalna ž da ŭdzielnikaŭ usich biez vyklučeńnia pieradač jon źviartajecca vyklučna na «ty».

— Ja nia čuŭ takich słovaŭ, — heta ŭsio, što moh skazać u adkaz Słava, prapuskajučy, viadoma, špilku nakont «niepasrednaha šefa».

— Navošta vy zabaranili Dzieda Maroza i Śniahurku?! — kryčaŭ Słavu čarhovy ŭdzielnik u prypadačnym stanie.

— U nas va ŭsich supermarkietach stajać fihurki Dziadoŭ Marozaŭ i Śniahurak, — sumna apraŭdvaŭsia Słava, zamiest taho, kab choć niejak vyśmiejać, adłupcavać svajho apanenta za hety novy fejk rasiejskaj prapahandy.

— Kali vam dapamahaje Eŭropa i suprać vas niama sankcyj, što ž vy tady ŭ łajnie siadzicie? — cikaviŭsia ŭ Słavy vychavany viadučy Ŭładzimir Sałaŭjoŭ.

U nas niama nafty i hazu, — mlava adbivaŭsia Słava, jak by aŭtamatyčna zhadžajučysia z tym, što Ukraina «siadzić u łajnie».

— U vas ich nikoli nie było, — paciskaŭ plačyma viadučy, pakidajučy, viadoma ž, apošniaje słova za saboj.

Adnak jak tolki Słava pačynaŭ havaryć bolš upeŭniena, jaho abryvali ŭžo značna bolš hruba.

— Nu ty možaš pamaŭčać choć dźvie chviliny?! Vy, čarnarotyje, užo Ukrainu razvalili i tut nikomu nie dajacie słova skazać («čarnarotyja» stajali ŭ hetaj studyi ŭ suadnosinach dva da šaści). Ty možaš pamaŭčać ci nie?!! — Heta ŭžo Słavu kryčaŭ jaho były suajčyńnik Śpirydon Kilinkaraŭ. I jon hety adkaz vysłuchoŭvaŭ z toj uśmieškaj, jakuju vy bačycie ŭ jakaści ilustracyi da hetaj publikacyi.

I voś hetuju novuju tyradu Sałaŭjova ŭ svoj adras: — Ja nie chaču vas pakryŭdzić, ale pakručasty chod vašych dumak nahadvaje mnie prožyłki miasa ŭ toŭstym kavałku sała, — Słava taksama ŭsprymaŭ zusim pakorliva. Na što kryŭdzicca? Uładzimir Rudolfavič skazaŭ ža, što nia choča pakryŭdzić, značyć — nia choča.

Słava znosić usio ździeki z cudoŭnym spakojem. Jon razumieje, što heta element šoŭ, heta ŭvachodzić u praviły hulni, i tamu treba ciarpieć. Treba tryvać, uśmichacca, potym znoŭ kryčać, potym znoŭ ciarpieć ździeki i znoŭ uśmichacca. Takaja rola była napisana dla Słavy arhanizatarami ŭsich hetych šoŭ, i jon vykonvaje jaje biezdakorna.

Hledačy z Rasiei, jakija stajać na kramloŭskim punkcie hledžańnia, Słavu nie pieranosiać. Jaho pazycyja ich razdražniaje. Jon ich chiba što raduje — jak by heta miakčej? — svaim tuhadumstvam. Hetyja hledačy pacirajuć ruki, kali ŭ adkaz na słabieńkija Słavavy natuhi abaranić ŭkrainskuju ŭładu jon — šyrk, šyrk, šyrk — atrymlivaje kuchtaloŭ ad viadučych tok-šoŭ, ad usioj ich kamarylli. Na zvarotny šyrk-šyrk-šyrk Słava zusim niazdolny jak čałaviek, pazbaŭleny humaru, ironii, sarkazmu, reakcyi i inšych jakaściaŭ, nieabchodnych dla paŭnavartasnaha ŭdziełu ŭ dyskusii.

Rasiejskich hledačoŭ, jakija pa svaich pohladach, chutčej, na baku Słavy, jon taksama razdražniaje, ale mienavita tym, što stvaraje ŭ hetych šoŭ vobraz tupoha ŭkrainca sa słaboj pazycyjaj, jakuju lohka asprečyć, i spres pazbaŭlenaha pačućcia ŭłasnaj hodnaści.

A pakolki ukraincaŭ u rasiejskich šoŭ ŭdzielničaje ŭsiaho čałavieki dva-try, bo surjoznyja eksperty ŭdzielničać u ich admaŭlajucca, hety vobraz samym naturalnym čynam retranślujecca na ŭsiu nacyju.

Ludziej u samoj Ukrainie, jakija pryblizna ŭjaŭlajuć sabie skład udzielnikaŭ hetych šoŭ, razdražniaje nia stolki sam pa sabie Słava, kolki toj fakt, što ŭ Rasiei jaho ŭsprymajuć surjozna.

Va Ŭkrainie naohuł nie mahli zrazumieć, chto jon, čym zaniaty, nichto nia bačyŭ jaho prac, nichto nia mieŭ nijakaha paniaćcia pra «Centar daśledavańniaŭ hramadzkich pracesaŭ Ekspert», jakim kiruje Słava. Nichto nia viedaje, ź jakoha hodu Słava kiruje hetym centram, što robić hety centar, u jakoha navat niama ŭłasnaha sajtu.

— Ja ŭžo amal siem hadoŭ viadu na ŭkrainskim TB roznyja prahramy pra palityku plus saču za tym, što adbyvajecca ŭ efiry u kankurentaŭ, — skazaŭ mnie Jaŭhien Kisialoŭ. — Za hety čas u mianie pabyvali ŭsie choć trochi surjoznyja palitolahi, a taksama palityčnyja ahladalniki, jakija nazyvajuć siabie palitolahami, ale na samoj spravie źjaŭlajucca mienavita palityčnymi kamentatarami, a jašče — sacyjolahi, palittechnolahi, palitkansultanty i h. d. Dyk voś, Słavy Koŭtuna nie isnuje ni ŭ adnoj ź pieraličanych ipastasiaŭ. Jon — taki ž fejk, jak tyja prapucinskaj «zachodnija palitolahi», jakija peryjadyčna źjaŭlajucca na RT. Akramia siabie, hety Słava nikoha nie pradstaŭlaje, — kaža Jaŭhien Kisialoŭ.

Pavialičyć

Fejsbuk Słavy, u jakim, čysta tearetyčna, jon jak palitolah moh by davać acenki pracesam u krainie i ŭ śviecie, ci choć pračytanym knižkam, abo prosta paścić anekdoty — ujaŭlaje saboj unikalnuju pa svajoj adnastajnaści źjavu. Pavodle hetaha fejsbuku možna zrabić vysnovu, što adziny zapał, adzinaja meta, adzinaja radaść, adzinaje ŭražańnie Słavavaha žyćcia — heta jaho ŭdzieł va ŭsio tych ža rasiejskich tok-šoŭ. Nia dumki ab hetych šoŭ, nie zaŭvahi, nie nazirańni, a tolki fiksacyja voś hetaha svajho ŭdziełu.

Słava — čałaviek bieź bijahrafii — raptam akazaŭsia ledź nia samym viadomym ukraincam Rasiei.

Samym zapatrabavanym rasiejskaj prapahandaj. Słava — heta takaja Halateja rasiejskich federalnych kanałaŭ, stvoranaja dla absłuhoŭvańnia svaich idealahičnych i kamercyjnych metaŭ.

Niepierakanaŭčaja Słavava abarona ŭkrainskich intaresaŭ adcianiaje i umacoŭvaje pazycyi jaho rasiejskich apanentaŭ. Słava im patrebny. I jany patrebnyja Słavu. Jany znajšli adzin adnaho — rasiejskaja prapahandysckaja mašyna i ŭkrainski patryjot, jaki zmazvaje jaje samim saboj, kab jana lepš pracavała, kab jana bolš efektyŭna cisnuła na tyja pryncypy, jakija jon byccam by adstojvaje. Adzinstva (nie baraćba) supraćlehłaściaŭ.

• 0
• 0
• 0
• 0
• 0
• 0
• 0
• 0